Bakı. 9 dekabr. REPORT.AZ/ "Neftçi" klubunun futbolçusu Namik Ələskərov Azərbaycan Premyer Liqasının XIV turunda evdə "Sumqayıt"la 0:0 hesablı heç-heçə etdikləri oyundan sonra brifinq keçirib.
Yarımmüdafiəçi "Report"un da suallarını cavablandırıb...
Niyə görə "Neftçi" qapanan komandalara qarşı qələbə qazanmaqda çətinlik çəkir? Məşqlərdə belə komandalara qarşı hazırlaşırmırsız?
- Qapalı komandaya qarşı oynamaq hər komanda üçün çətindir. Biz məşqlərdə hər cür komandalara qarşı hücumlara hazırlaşırıq. Bu gün "Sumqayıt" yaxşı müdafiə olundu və qələbə qazana bilmədik.
"Sumqayıt" meydana 5 müdafiəçi ilə çıxmışdı, əvəzetmədən sonra daha 2 müdafiəçi də oyuna daxil oldu. 7 müdafiəçiyə qarşı oynamaq necə idi?
- Doğrudan da "Sumqayıt" bu gün yaxşı müdafiə olundu, boşluq vermədi. Həm də düzgün qeyd etdiniz ki, meydanda 7 müdafiəçi var idi. Yarımmüdafiəçi geri çəkilib oynayanda boşluqlar tapmaq olur, amma 7 müdafiəçiyə qarşı oynamaq doğrudan çox çətin idi.
Əsas rəqibiniz "Qarabağ" 6 qol ilə qələbə qazandı. Düşünmürsünüz ki, onlar artıq özünə gəliblər və mübarizə daha da çətinləşəcək?
- Onların da xal itirdiyi oyunlar olub. Biz də onları məğlub etmişik, başqa oyunlarda xal itirmişik. Bu uzun yarışdır və sona qədər mübarizə aparıb çempion olmaq istəyirik.
- Düzdür, qışdan sonra daha çətin olacaq. Amma biz qış fasiləsində yaxşı hazırlıq keçib çempion olmaq üçün əlimizdən gələni edəcəyik.
Qurbanovun milli komandadan ayrılması barədə nə deyə bilərsiniz?
- Bu barədə heç nə demək istəmirəm. Bu, Qurban Qurbanov və AFFA rəhbərliyi arasında olan məsələdir.
Növbəti oyunlarda kubokda "Sumqayıt"la qarşılaşacaqsınız. Sizcə, həmin oyunlar necə keçəcək?
- Həmin oyunlar da çox çətin keçəcək. Kubokda da hədəfimiz finala çıxıb, qalib olmaqdır.
Yeni gələn oyunçular necədir?
- Yəqin ki, izlənilib və məsləhət bilinib deyə komandaya transfer ediliblər. Mamadu Kanu məşqlərdə iştirak edir, Mamadu Mbodj isə hələ təzə transfer olunub və komandaya qoşulmayıb.