Meksika milli komandasına yeni baş məşqçi təyin olunub

Bakı. 28 avqust. REPORT.AZ/ Rikardo Ferretti futbol üzrə Meksika milli komandasına baş məşqçi təyin olunub. 

"Report"un məlumatına görə, braziliyalı mütəxəssis sentyabrdakı qarşılaşmalar zamanı yığmada baş məşqçi səlahiyyətlərini yerinə yetirəcək. Eyni zamanda "Tiqres"in sükanı arxasında yer alan Ferrettinin klubu ilə bütün detallar razılaşdırılıb. 64 yaşlı baş məşqçi sentyabrın 8-də Uruqvay, sentyabrın 12-də isə ABŞ-la görüşlərdə milliyə rəhbərlik edəcək. 

Qeyd edək ki, Rikardo Ferretti Meksika yığmasında 2015-ci ildə də çalışıb. Həmin vaxt da o, baş məşqçi səlahiyyətlərini icra edib.