"Mançester Yunayted"in oyununda terror təhlükəsinə görə təxliyyə olunanlar arasında azərbaycanlı azarkeşlər də olub

Bakı. 16 may. REPORT.AZ/ Futbol üzrə İngiltərə Premyer Liqasında XXXVIII turun təxirə salınmış "Mançester Yunayted" - "Bornmut" matçı zamanı tribunadan təxliyyə olunanlar arasında azərbaycanlı azarkeşlər də olub. "Report"un məlumatına görə, bu barədə həmin fanatlardan biri BBC-yə açıqlamasında bildirib.

"Biz Azərbaycandan gəlmişik. 8 saatlıq uçuşdan sonra Mançesterə çatmışıq. Ümid edirik ki, oyun yenidən təxirə salınmayacaq" - deyə adı açıqlanmayan azarkeş vurğulayıb.

Qeyd edək ki, mayın 15-də keçirilməli olan oyun "Old Trafford" stadionunda şübhəli zərf tapılması səbəbindən təxirə salınıb. Dərhal tribunalardan ikisi boşaldılıb. Oyun isə 17 may Bakı vaxtı ilə saat 23:00-a təxirə salınıb.