Kriştianu Ronaldu: "Vaxtilə "Mançester Yunayted"ə yox, "Yuventus"a keçə bilərdim"

Bakı. 29 dekabr. REPORT.AZ/ İspaniyanın "Real Madrid" klubunun futbolçusu Kriştianu Ronaldunun vaxtilə İtaliya "Yuventus"una keçmək variantı olub. "Report"un məlumatına görə, bu barədə portuqaliyalı hücumçunun özü Turin komandasının əfsanəvi futbolçusu Alessandro Del Pyeroya müsahibəsində bildirib.

O deyib ki, hələ 17 yaşında Portuqaliyanın "Sportinq" komandasında çıxış etdiyi vaxt onunla çoxlu maraqlanan olub: "Agentim Jorje Mendeş mənim üçün vacib insan kimi daim doğru məsləhətlər verib. Xatırlayıram ki, mənimlə "Yuventus" maraqlanırdı. Çox sevinirdim, çünki bu, böyük klub idi. Həmin vaxt "Real Madrid", "Mançester Yunayted" və digər variantlar var idi. Lakin ən yaxşısı "qırmızı şeytanlar"dan gəldi və mənim İngiltərədə oynamaq arzum həyata keçdi. Karyeramı İtaliyada yox, İngiltərədə davam etdirmək istəyirdim. Nəticədə belə bir imkan yarandı".

Qeyd edək ki, Kriştianu Ronaldu "Mançester Yunayted"ə 2003-cü ildə keçib. O, "Real Madrid"də isə 2009-cu ildən çıxış edir.