Yuxarı

"Kəpəz" - "Qarabağ" matçına 20 min azarkeş gəlib, oyunda gərginlik yaşanıb - VİDEO

Qarşılaşma Ağdam klubunun qələbəsi ilə başa çatıb

Bakı. 14 fevral. REPORT.AZ/ Futbol üzrə Azərbaycan Premyer Liqasının XXI turunun mərkəzi görüşü "Kəpəz"lə "Qarabağ" arasında baş tutub.

"Report" xəbər verir ki, Gəncə şəhər stadionunda keçirilən oyuna 20 mindən çox azarkeş gəlib.

Onların arasında uşaqlar və qadınlar da olub. Fəxri tribunadan isə matçı Azərbaycan milli komandasının baş məşqçisi Robert Prosineçki ilə "Kəpəz"in Müşahidə Şurasının sədri Elmir Vəliyev də izləyib.

Matç kifayət qədər maraqlı və gərgin alınıb. Hesabı 10-cu dəqiqədə Rəşad Sadıqov açıb. Zərbədən sonra yan xətt hakimi bayrağını qaldıraraq, oyundan kənar vəziyyət olduğunu iddia etsə də, baş hakim Ömər Paşayev qolu qeydə alıb.

"Kəpəz" bərabərlik qolunu 45-ci dəqiqədə vurub. Klubda icarə əsasında oynayan Namiq Ələsgərov müqavilə üzrə məxsus olduğu "Qarabağ"ı məyus edib. Amma o, qoluna sevinməyib.

68-ci dəqiqədə meydanda gərginlik yaranıb. Hava mübarizəsi zamanı "Kəpəz"in üzvü Julien Ebah dirsəklə Rəşad Sadıqovun başına zərbə endirib. Nəticədə Sadıqovun başından qan açılıb. İki komandanın futbolçuları arasında münaqişə hakimlərin müdaxiləsindən sonra aradan qalxıb. Amma Ebah üzr istəmək üçün Sadıqova tərəf yönəldikdə, kapitan ona emosional cavab qaytararaq, üzrxahlığı qəbul etməyib.

Oyunda son nöqtəni Əfran İsmayılov qoyub. Onun künc zərbəsindən qaldırdığı top birbaşa tora daxil olub.

Beləliklə, "Qarabağ" "Kəpəz"ə öz meydanında bu mövsüm ikinci dəfə məğlubiyyət acısı yaşadıb və 44 xalla liderliyini davam etdirib. 32 xalı olan "Kəpəz" isə ardıcıl 2 ev qələbəsindən sonra məğlub olaraq 3-cü pilləni əldən vermə təhlükəsi ilə üzləşib.

Mətndə orfoqrafik səhv aşkar etdinizsə, səhv olan hissəni qeyd edib Ctrl + Enter düymələrini sıxın.

Xəbər lenti

Bütün xəbərlər


Orphus sistemi