Yuxarı

İspaniya millisinin baş məşqçisi: "Final matçının taleyinin penaltilərdə həll olunmasını istəmirik"

Santi Denia: Portuqaliya güclü rəqibdir

Bakı. 20 may. REPORT.AZ/ "Düşünürəm ki, finalda bərabər səviyyəli oyun görəcəyik. Portuqaliya güclü rəqibdir". "Report"un məlumatına görə, bunu İspaniyanın 17 yaşadək futbolçulardan ibarət milli komandasının baş məşqçisi Santi Denia Bakıdakı Avropa çempionatında Portuqaliya ilə keçirəcəkləri final görüşündən öncə mətbuat konfransında deyib.

S.Denia həlledici görüşün hansı stadionda keçirilməsinin önəmli olmadığını vurğulayıb: "Əsas odur ki, final oynayırıq. Stadionun seçimi UEFA tərəfindən aparılır. Bu, bizə aid olan məsələ deyil. Bu görüşdə nəticəni xırda detallar həll edəcək. Yaxşı iş görən komanda çempion olacaq". 

42 yaşlı mütəxəssis bildirib ki, görüşün taleyinin penaltilərdə həll olunmasını istəmirlər: "Penaltini nə qədər məşq etsən də, oyunda başqa cür olur, təzyiq hiss edirsən. Bizdə milliyə seçimlər həmişə eyni olur. Əksər vaxtlarda U-16 və U-17 ilə birgə seçimlər olur. Sonda əlimizdə 30 futbolçu olur və 18 nəfər seçirik. Əvvəlki qarşılaşmalarda sərgilədiyimiz oyunu finalda da göstərməyə çalışacağıq. Rəqibin səhvlərindən yaralanmağa cəhd edəcəyik. İspaniya ən pis statistika ilə finala gəlib. Mən də bu barədə komanda ilə söhbət etmişdim və onlara bu barədə məlumat vermişəm. Görürəm ki, onlar bundan nəticə çıxarıb və dəyərləndiriblər. Bu günə qədər həm oyun, həm də məşqlərdən zöv almışdıq". 

Qeyd edək ki, İspaniya - Portuqaliya matçı mayın 21-də "Bakcell Arena"da keçiriləcək. Oyun saat 20:00-da başlanacaq. 

Mətndə orfoqrafik səhv aşkar etdinizsə, səhv olan hissəni qeyd edib Ctrl + Enter düymələrini sıxın.

Xəbər lenti

Bütün xəbərlər


Orphus sistemi