Yuxarı
    Bağlamaq

    "İnter"in rəhbəri: "Komandada itkilərdən və Rauf Əliyevin son hərəkətindən başqa heç bir problem yoxdur" - MÜSAHİBƏ

    Komandamız ciddi itkilərə, Rauf Əliyevin futbola, insanlığa layiq olmayan hərəkətinə baxmayaraq, gözəl çıxış etdi

    Bakı. 12 avqust. REPORT.AZ/ Bakı "İnter"inin Müşahidə Şurasının sədri Zaur Axundov "Qəbələ"yə evdə 1:2 hesabı ilə uduzduqları Azərbaycan Premyer Liqasının ilk tur matçından sonra brifinq keçirib. "Report"un məlumatına görə, paytaxt klubunun rəhbəri əvvəlcə oyunu dəyərləndirib...

    - Oyunumuzdan tam razı qaldım. Komandamız ciddi itkilərə, Rauf Əliyevin futbola, insanlığa layiq olmayan hərəkətinə, komandanı atıb qaçmasına baxmayaraq, gözəl çıxış etdi. Bu, gözlənildiyimdən də artıq oldu. Demək olar ki, minimum heç-heçəyə layiq idik. Amma bu, futboldur. Sona doğru 2-3 yüzfaizlik qol vəziyyəti yaratdıq. Amma nə etmək olar?

    - Komandanızın turdan-tura daha yaxşı yerlər tutacağına ümidiniz var?

    - Yüz faiz. Ümidim olmasaydı, burada olmazdım. Transfer qadağası ilə əlaqədar qışadək bacardığımızı edəcəyik. Fuad Bayramovla Nizami Hacıyevin zədəli olması ehtiyat oyunçular skamyamızın qısalığı öz təsirini göstərdi. Amma hamı gördü ki, "İnter" "Qəbələ"dən nəinki geri qalırdı, hətta bir çox vəziyyətlərdə daha üstün oyun sərgiləyirdi.

    - Rauf Əliyevin komandanı atıb qaçdığını dediniz. İndi o, Albaniyada "Kukesi"nin düşərgəsindədir?

    - Raufun 2018-ci ilin iyununadək müqaviləsi var. Bu, tamhüquqlu anlaşmadır. O, çox böyük səhvə yol verdi. Özünə də dedim. Albaniya klubuna da etirazımızı bildirmiş, Əliyevlə müqaviləmizin əslini göndərmişik. Bazar ertəsi ingiliscə tərcüməsini də göndərəcəyik. İnanmıram ki, Rauf "Kukesi" ilə müqavilə imzalasın. O, hansı ağılla gedib, başa düşmürəm.

    - Cəzalandıracaqsınız?

    - Əliyev komandaya qayıtmalıdır. Başqa variantı yoxdur. Müqavilə bir tərəfə qalsın, komandanı belə bir vəziyyətdə, transfer edə bilmədiyimiz, ağır itkilərlə üzləşdiyimiz vaxt yarı yolda atıb qaçdı.

    - "Kukesi" "İnter"ə hər hansı məbləğ təklif edib?

    - Xeyr. Heç bir məbləğ ödəməyib. Albaniya klubundan bizə rəsmi heç nə gəlməyib. Kim hansı oyunçu ilə nə qədər istəyirsə, danışsın. Amma rəsmi məktub yoxdur.

    - Bəs Rauf Əliyevin Albaniyaya getməsinə səbəb nədir?

    - Bilmirəm. Əliyevlə "İnter"ə yeni gəldiyim vaxt da söhbətim olmuşdu. O, mənə demişdi: "Düzdür, komanda axtarıram. Amma siz gələndən sonra ümidimiz yaranıb ki, "İnter" inkişaf edəcək. Mən sizinləyəm". Bu, bir tərəfə. İnsanın bizimlə müqaviləsi var. 2-3 yaşlı uşaq da belə addım atmazdı. Hansı ağılla ora getdiyini başa düşmürəm. Amma FİFA qayda-qanununa əsasən, inanmıram ki, onu "Kukesi"yə qəbul etsinlər.

    - Adrian Skarlatake ilə yeni müqavilə bağladınız?

    - Bəli. Hamı ilə bağlanılıb, hamı da razıdır. Komandada heç bir problem yoxdur. İtkilərdən və Raufun son hərəkətindən başqa.

    - "İnter"in adını dəyişməsi nə zaman gerçəkləşəcək?

    - Hələlik "İnter" adı ilə çıxış edirik. Yəqin ki, bir müddət çəkəcək. Mövsümün ortasında komandanın adının dəyişilməsinə gəlincə, bunlar hüquqi məsələlərdir. Hüquqi məsələlər yekunlaşdıqdan sonra "İnter"in adı dəyişdiriləcək.  

    Mətndə orfoqrafik səhv aşkar etdinizsə, səhv olan hissəni qeyd edib Ctrl + Enter düymələrini sıxın.

    Xəbər lenti

    Ən azı bir bölmə seçilməlidir

    Bütün xəbərlər


    Orphus sistemi