Yuxarı

İngiltərə millisinin baş məşqçisi: "Bakının gözəlliyi bizi çox təəccübləndirdi"

Avropa çempionatı Azərbaycan yığmasına lazımi təcrübəni qazandıracaq

Bakı. 5 may. REPORT.AZ/ "Biz Bakıya daha tez gəlmişik. Bu səbəbdən, şəhəri gəzmək üçün kifayət qədər vaxtımız olub. Bakının gözəlliyi bizi çox təəccübləndirdi və xoşumuza gəldi. Üstəlik, məşqlərimiz ayrı-ayrı meydanlarda olduğu üçün yol gedib gələndə paytaxtınızı görürdük. Ən əsası, Bakının havası çox gözəldir, İngiltərədən çox fərqlənir". "Report"un məlumatına görə, bunu İngiltərənin 17 yaşadək futbolçulardan ibarət milli komandasının baş məşqçisi Stiven Kuper Azəbaycan paytaxtında bu gün start götürəcək Avropa çempionatı barədə danışarkən deyib. 

37 yaşlı mütəxəssis bildirib ki, çempionatın bu mərhələsinə gələn bütün komandalar çox güclüdür: "Çünki final mərhələsinə vəsiqə qazanmaq çətindir. Üstəlik, nəzərə almaq lazımdır ki, burada çox sürpriz komandalar olacaq. Çempionatda ilk dəfə Azərbaycanla Bosniya və Herseqovina milliləri də iştirak edir. Qaydalara əsasən, 16 ölkənin iştirakı belə komandaların da final mərhələsinə qatılmaları üçün üstünlük qazandırır. Bu turnir onlara lazımi təcrübə qazandıracaq". 

C qrupunda yer alan İngiltərə millisi ilk görüşünü mayın 6-da İsveçə qarşı keçirəcək. S.Kuperin fikrincə, bütün rəqiblər güclüdürlər: "Qrupumuzda zəif komanda yoxdur. İsveç, Fransa və Danimarka ilə çətin oyunlarımız olacaq".

Qeyd edək ki, İngiltərə millisi Bakıya aprelin 29-da gəlib. 

Mətndə orfoqrafik səhv aşkar etdinizsə, səhv olan hissəni qeyd edib Ctrl + Enter düymələrini sıxın.

Xəbər lenti

Bütün xəbərlər


Orphus sistemi