Yuxarı

​Hollandiya yığmasının baş məşqçisi: "Bakıda yaradılan şəraiti çox bəyəndim" - MÜSAHİBƏ

Portuqaliya yığması yarımfinala qədər o qədər də güclü olmayan komandalarla qarşılaşdı

Bakı. 18 may. REPORT.AZ/ Hollandiyanın 17 yaşadək futbolçulardan ibarət yığma komandasının baş məşqçisi Kes van Vonderen Bakıdakı Avropa çempionatının yarımfinalında Portuqaliya millisinə 0:2 hesabı ilə uduzduqları görüşdən sonra jurnalistlərin suallarını cavablandırıb. "Report" həmin müsahibəni təqdim edir...

- Komandanız Portuqaliyaya 0:2 hesabı ilə uduzmaqla Bakıda final oynamaq şansını itirdi. Məğlubiyyətin səbəbini nədə görürsünüz? 

- Bizim üçün çətin oyun idi. Matçın ilk 10 dəqiqəsində yaxşı oynadıq. Amma sonradan Portuqaliya üstünlüyü ələ aldı. Rəqib gücünü göstərdi. Portuqaliya yığması çox güclü rəqibdir.

- Futbolçularınızın oyunundan razı qaldınız? 

- Bəli, razıyam. Komandam əlindən gələni etdi. Amma təəssüf ki, məğlubiyyətdən qaçmaq mümkün olmadı.

- Sona yaxın bir epizodda futbolçularınız təkidlə penalti tələb edirdilər. Həqiqətənmi referi həmin epiozdda Hollandiya yığmasına qarşı haqsızlıq etdi? 

- Bu barədə dəqiq söz deyə bilmərəm. Çünki oturduğum yerdən epizodu görmək çətin idi. Amma bu, elə də əhəmiyyət daşımırdı. Çünki Portuqaliya güclü idi.

- Finala yüksələn Portuqaliya yığması hələ də qapısında qol görməyib. Buna səbəb nədir: Komandanın müdafiə xətti güclüdür, yoxsa rəqiblərin hücum xətti zəifdir? 

- Portuqaliya yığması yarımfinala qədər o qədər də güclü olmayan komandalarla qarşılaşdı. Amma bunu deməklə onların əməyinə kölgə salmaq fikrində deyiləm. Portuqaliyanın müdafiə xətti güclüdür. Oyunçuların fərdi ustalıq səviyyəsi də yüksəkdir.

- Azərbaycanı hansı təəssüratlarla tərk edirsiniz? 

- Təəssüratlarım çox yaxşıdır. Azərbaycan, paytaxt Bakı şəhəri çox gözəldir. Buradakı insanları, məşq meydançalarını, stadionları, komandalar üçün yaradılan şəraiti çox bəyəndim. Bir gün yenidən Bakıya qayıtmaq istərdim.

Mətndə orfoqrafik səhv aşkar etdinizsə, səhv olan hissəni qeyd edib Ctrl + Enter düymələrini sıxın.

Xəbər lenti

Bütün xəbərlər


Orphus sistemi