Yuxarı

Bu gün futbol üzrə Çempionlar Liqasında 1/4 final mərhələsinin ilk 2 oyunu keçiriləcək

Yuventus Monakonu, Atletiko Real Madridi qəbul edəcək

Bakı. 14 aprel. REPORT.AZ/ Bu gün futbol üzrə Çempionlar Liqasında 1/4 final mərhələsinə start veriləcək. "Report"un məlumatına görə, ilk oyun günündə 2 görüş keçiriləcək.

İtaliyada "Yuventus" Fransa "Monako"sunu qəbul edəcək. "Qoca Sinyora" turnirin yarımfinalına sonuncu dəfə 10 il öncə vəsiqə qazanıb. Turin təmsilçisi hazırda elə də yaxşı formada deyil. Komandanın lideri Pol Poqba zədəlidir, Andrea Pirlonun meydana çıxması sual altındadır və hücumçu Karlos Teves oynasa da, tam hazırlıqlı deyil. Üstəlik, "Yuventus" ötən həftəsonu İtaliya çempionatı matçında "zirzəmi"dəki "Parma"ya uduzub. "Monako"da isə Jeremi Tulalanın oynaması sual altındadır. Əvəzində son 6 matçda 6 qol vurmuş 19 yaşlı Antoni Marsial yaxşı formadadır.

İspaniyada isə "Atletiko" və "Real Madrid" komandaları üz-üzə gələcək. Bu görüş son zamanlar Madrid derbisindən çox yeni "El Klasiko" statusunu almağa başlayıb. Çempionlar Liqasının ötənilki finalçıları bu mövsüm 1/4 finalda qarşılaşacaqlar. Həmin finalda "Atletiko" uduzsa da, sonrakı görüşlərdə "Real Madrid"ə 4 dəfə - İspaniya Superkubokunda, 2 dəfə La Liqada və ölkə kubokunda qalib gəlib.

Bugünkü matça hər iki komanda itkisiz çıxacaq. "Atletiko"da Mario Mancukiç, "Real Madrid"də Xames Rodrigeslə Serxio Ramos zədələrini tam bərpa edib. "Kral klubu"nun hücum xəttində əsas "silah"ı 8 qolla Çempionlar Liqasında bombardirlik edən Kriştianu Ronaldudur. "Atletiko"da isə Antuan Qrizman ön plana çıxsa da, baş məşqçi Dieqo Simeonenin komandası taktiki bacarığı ilə fərqlənir.

Çempionlar Liqası

1/4 final, ilk oyunlar

23:45. "Yuventus" (İtaliya) - "Monako" (Fransa)

Baş hakim: Pavel Kralovets (Çexiya)

23:45. "Atletiko" (İspaniya) - "Real Madrid" (İspaniya)

Baş hakim: Milorad Majiç (Serbiya).

Mətndə orfoqrafik səhv aşkar etdinizsə, səhv olan hissəni qeyd edib Ctrl + Enter düymələrini sıxın.

Xəbər lenti

Bütün xəbərlər


Orphus sistemi