Ə.Abdullayev: “Bizdə hücumçu problemi var”

Bakı. 30 yanvar. REPORT.AZ/ "Sumqayıt"ın heyətində güclü oyunçular var və bu komandaya qarşı oynamaq asan deyil. Çətin olacağını bilirdik. Amma qələbə qazanmağı bacardıq".

"Report"un məlumatına görə, bunu "Neftçi"ın baş məşqçisi Əsgər Abdullayev deyib.

Ə.Abdullayev Premyer Liqanın XIX turunda "Sumqayıt"la səfər oyununda qeydə alınmış 1:0 hesablı qələbəni belə şərh edib:

"Bir çox futbolçular pik nöqtəsində deyil və zədə səbəbindən məşqə az çıxanlar da var. İnanıram ki, gələcəkdə daha yaxşı oyun göstərəcəyik".

Təcrübəli mütəxəssis ölkə xaricində təlim-məşq toplanışı keçmək haqda bunları deyib:

"Bakıda qalmağımızın üstün cəhəti o oldu ki, əvəzedici heyətdən oyunçuları yoxladıq. Bu baxımdan biz nəsə əldə etdik. Əlbəttə ölkə xaricində daha güclü komandalarla oynayıb nəsə əldə etmək mümkündür. Ancaq heyətə baxdıqda görünür ki, "Neftçi" gənc komandadır. Azərbaycan futboluna bu oyunçuların köməyi olacaq və milliyə də düşə biləcəklər".

"3 futbolçumuz sarı vərəqəyə görə bu oyunu buraxıb. Fasilədə yarımmüdafiə mövqeyində kimin oynaya biləcəyini müəyyənləşdirdik. Yeni transferimiz Elşəni perspektivli futbolçu kimi görürəm. Onun oyununu da bəyənmişəm. Elşəndən yaxın günlərdə olmasa da, yaxın aylarda bəhrələnə biləcəyik. Bizdə hücumçu problemi var. Orada Arazı yoxladıq, Ruslandan istifadə edirik. Anyete də sırf hücumçu deyil. Bu mənada hücumçuya ehtiyacımız daha çoxdur. Bir də sol müdafiəçi mövqeyində çıxış edən futbolçu olsa, yaxşı olar. Kaue komandadan göndərilməyib. Ancaq bu gün oyuna baxdı. Onunla klubun heç bir problemi yoxdur. Onunla yolların ayrılacağı barədə tam məlumatım yoxdur".