Bakı. 24 fevral. REPORT.AZ/ Bu gün futbol üzrə Çempionlar Liqasında 1/8 final mərhələsinin ilk turuna yekun vurulacaq. "Report"un məlumatına görə, gecə 2 qarşılaşma keçiriləcək.
Hollandiyanın PSV klubu doğma azarkeşlər önündə İspaniya "Atletiko"sunu qəbul edəcək. Komandalar Eyndhoven şəhərindəki "Filips" stadionunda üz-üzə gələcəklər. Hollandiya təmsilçisi qrup mərhələsini 10 xalla 2-ci pillədə başa vurubsa, Madrid klubu 13 xal toplayaraq qrup lideri olub. Matçın start fiti Bakı vaxtı ilə saat 23:45-də səslənəcək. Görüş italiyalı referi Danielo Orsatoya həvalə olunub.
Gecənin digər qarşılaşması Ukraynanın paytaxtı Kiyevdə olacaq. Yerli "Dinamo" İngiltərənin "Mançester Siti" komandası ilə münasibətlərinə aydınlıq gətirəcək. D qrupunu 12 xalla ilk pillədə başa vuran "şəhərlilər" və G qrupunu 11 xalla ikinci pillədə bitirən Kiyev təmsilçisi arasındakı görüş ispaniyalı referi Antonio Mateo Laosa həvalə olunub. Kiyevdəki "Olimpiyskiy" stadionunda keçiriləcək qarşılaşma Bakı vaxtı ilə saat 23:45-də start götürəcək.
Çempionlar Liqası, 1/8 final
23:45. PSV (Hollandiya) - "Atletiko" (Madrid, İspaniya)
Baş hakim: Danielo Orsato (İtaliya)
Eyndhoven. "Filips" stadionu
23:45. "Dinamo" (Kiyev, Ukrayna) - "Mançester Siti" (İngiltərə)
Baş hakim: Antonio Mateo Laos (İspaniya)
Kiyev. "Olimpiyskiy" stadionu
Qeyd edək ki, digər oyunlarda PSJ (Fransa) "Çelsi"ni (İngiltərə) 2:1, "Benfika" (Portuqaliya) "Zenit"i (Rusiya) 1:0, "Volfsburq" (Almaniya) səfərdə "Gent"i (Belçika) 3:2, "Real Madrid" (İspaniya) isə "Roma"nı (İtaliya) 2:0 hesabı ilə məğlub edib. "Arsenal" (İngiltərə) - "Barselona" (İspaniya) oyununda 0:2, "Yuventus" (İtaliya) - "Bavariya" (Almaniya) görüşündə isə 2:2 hesabı qeydə alınıb.