Yuxarı

"Liverpul" klubu 14 ildən sonra Çempionlar Liqasının qalibi olub - YENİLƏNİB-4 - VİDEO

"Liverpul" klubu 14 ildən sonra Çempionlar Liqasının qalibi olub

UEFA Çempionlar Liqasında 2018-2019 mövsümünün qalibi müəyyənləşib.

"Report"un məlumatına görə, İngiltərənin "Liverpul" komandası tarixində 6-cı dəfə bu titula sahib olub. Yurgen Kloppun baş məşqçi olduğu kollektiv finalda ölkənin digər təmsilçisi "Tottenhem"i məğlubiyyətə uğradıb - 2:0. Hesabı 2-ci dəqiqədə Məhəmməd Salah açıb. Sloveniyalı referi Damir Skomina matçın əvvəlində topun Mussa Sissokonun əlinə dəyməsi səbəbindən penalti təyin edib. Misirli hücumçu bu imkandan lazımınca yararlanıb. Bu, Çempionlar Liqasının final oyunlarında vurulmuş üçüncü ən sürətli qol olub. Salah 108-ci saniyədə fərqlənibsə, 1959-cu ildə İspaniya "Real Madrid"inin oyunçusu Enrike Mateos Almaniya "Ayntraxt"ını 7:3 hesabı ilə yendikləri görüşün 60-cı, 2005-ci ildə isə İtaliya "Milan"ının müdafiəçisi Paolo Maldini elə "Liverpul"la əsas vaxtı 3:3 hesabı ilə nəticələnən görüşün 51-ci saniyəsində fərqlənib.

Oyunda son nöqtəni isə 87-ci dəqiqədə Divok Origi Joel Matipin ötürməsindən sonra qoyub.

Beləliklə, "Liverpul" 1977, 1978, 1981, 1984 və 2005-ci ildən sonra yenidən Avropanın ən nüfuzlu klub turnirinin qalibi olub. "Qırmızılar" 14 avqust 2019-cu ildə Türkiyənin İstanbul şəhərindəki "Wodafone Park"da keçiriləcək UEFA Super Kuboku matçında Bakıda Avropa Liqasının qalibi olmuş İngiltərənin digər təmsilçisi "Çelsi" ilə üz-üzə gələcək.


00:50

UEFA Çempionlar Liqasında İngiltərənin "Tottenhem" və "Liverpul" komandaları arasında keçirilən final oyununda ikinci qol vurulub. 

"Report"un məlumatına görə, 87-ci dəqiqədə "Liverpul"un 27 nömrəli futbolçusu Divok Origi fərqlənərək, hesabı 2:0-a çatdırıb.


UEFA Çempionlar Liqasında İngiltərənin "Tottenhem" və "Liverpul" komandaları arasında keçirilən final oyununda ikinci hissə başlayıb. "Report"un məlumatına görə, ilk yarıdan sonra "Liverpul" Məhəmməd Salahın 2-ci dəqiqədə penaltidən vurduğu qolla öndədir - 1:0.


00:01

UEFA Çempionlar Liqasında İngiltərənin "Tottenhem" və "Liverpul" komandaları arasında keçirilən oyunda ilk yarı başa çatıb. "Report"un məlumatına görə, komandalar fasiləyə "Liverpul"un 1:0 hesablı üstünlüyü ilə çıxıblar.


23:07

İngiltərənin "Tottenhem" və "Liverpul" komandaları arasında Çempionlar Liqasının final oyununda hesab erkən açılıb. 

"Report" xəbər verir ki, matçın 1-ci dəqiqəsində təyin olunmuş penaltini "Liverpul"un hücumçusu Məhəmməd Salah dəqiq zərbə ilə qola çevirib.


23:00

UEFA Çempionlar Liqasında İngiltərənin "Tottenhem" və "Liverpul" komandaları arasında Çempionlar Liqasının final oyunu start götürüb.

"Report" xəbər verir ki, oyun İspaniya millisinin sabiq futbolçusu Xuan Antonio Reyesin avtomobil qəzasında ölümü ilə əlaqədar bir dəqiqəlik sükutla başlayıb.

Komandalar meydana aşağıdakı start heyəti ilə çıxıblar...

"Tottenhem": 1. Uqo Lyoris, 2. Kiran Trippye, 3. Denni Rouz, 4. Tobi Alderveyreld, 5. Yan Vertongen, 7. Hyunq-Min Son, 8. Harri Uinks, 10. Harri Keyn, 17. Mussa Sissoko, 20. Dele Alli, 23. Kristian Eriksen

"Liverpul": 13. Alisson Bekker, 3. Fabinyo, 4. Vircil van Deyk, 5. Jorjinyo Veynaldum, 9. Roberto Firmino, 10. Sadio Mane, 11. Məhəmməd Salah, 14. Cordan Henderson (kap.), 26. Endi Robertson, 32. Joel Matip, 66. Trent Aleksander-Arnold

Qeyd edək ki, oyun İspaniyanın paytaxtı Madriddəki "Vanda Metropolitano" stadionunda keçirilir. Görüşü sloveniyalı Damir Skominanın rəhbərlik etdiyi hakimlər briqadası idarə edir.

Mətndə orfoqrafik səhv aşkar etdinizsə, səhv olan hissəni qeyd edib Ctrl + Enter düymələrini sıxın.

Xəbər lenti

Son xəbərlər



Orphus sistemi