Yuxarı
    Bağlamaq

    ​"Borussiya Dortmund" erməni futbolçusunu Bakıya gətirməyəcək

    Henrik Mxitaryana viza verilməsində problem yaranıb

    Bakı. 19 oktyabr. REPORT.AZ/ Almaniyanın "Borussiya" (Dortmund) klubu Avropa Liqasının qrup mərhələsinin III turunda Bakıda qarşılaşacağı "Qəbələ" ilə oyuna erməni futbolçusu Henrik Mxitaryanı gətirməyəcək.

    "Report"un məlumatına görə, bu barədə klubun baş direktoru Hans Yoaxim Vatske "Bild" nəşrinə açıqlamasında deyib.

    O bildirib ki, komandası oktyabrın 22-də keçiriləcək matçda təhlükəsizlik tədbiri olaraq, Mxitaryansız keçinəcək:

    "O, güman ki, bizimlə uçmayacaq. Ermənistanla Azərbaycan arasındakı münaqişəni nəzərə alaraq, öz oyunçularımızın təhlükəsizliyinin qayğısına qalmalıyıq. Oyunçu özünü yaxşı hiss etmirsə, bu, nəzərə alınacaq".

    "Borussiya"nın meneceri Mixael Tsork isə bildirib ki, 26 yaşlı yarımmüdafiəçiyə vizanın verilməsində də problem yaranıb. Bu da Mxitaryanın son illərdə münaqişəli Dağlıq Qarabağ bölgəsində olması ilə əlaqədardır.

    "Qəbələ"nin baş meneceri Zaur Əzizov isə Mxitaryanın Bakıya gətirilməyəcəyindən məlumatsız olduqlarını bildirib. O, Almaniya klubunun Azərbaycan paytaxtına gələcək futbolçularının siyahısını oktyabrın 19-da alacaqlarını diqqətə çatdırıb.

    Qeyd edək ki, "Bakcell Arena"da keçiriləcək "Qəbələ" - "Borussiya" matçı saat 20:00-da başlanacaq.

    Mətndə orfoqrafik səhv aşkar etdinizsə, səhv olan hissəni qeyd edib Ctrl + Enter düymələrini sıxın.

    Xəbər lenti

    Ən azı bir bölmə seçilməlidir

    Bütün xəbərlər


    Orphus sistemi