Azərbaycanın futzal yığması AÇ-nin ¼ finalına vəsiqə qazanıb

Bakı. 8 fevral. REPORT.AZ/ Mini-futbol üzrə Azərbaycan yığması Avropa çempionatının ¼ final mərhələsinə vəsiqə qazanıb.

“Report” xəbər verir ki, bu, İtaliya millisinin qrup mərhələsində Çexiyanı 7:0 hesabı ilə darmadağın etməsi sayəsində mümkün olub. Milli ¼ finala “D” qrupunun ikincisi kimi çıxıb.

Növbəti mərhələdə komandamızın rəqibi Rusiya millisi olacaq. Qarşılaşma fevralın 9-da keçiriləcək. Görüş Bakı vaxtı ilə 21:30-da başlayacaq.

Digər ¼ final oyunlarında Serbiya-Ukrayna, Portuqaliya-İspaniya və Qazaxıstan-İtaliya qarşılaşmaları baş tutacaq.
Yarımfinal oyunları fevralın 11-də, final və üçüncü yer uğrunda görüş fevralın 13-də keçiriləcək.
Avropa Çempionatı Serbiyanın paytaxtı Belqrad şəhərində təşkil olunub.