Yuxarı
    Bağlamaq

    Azərbaycan Premyer Liqasının gümüş və bürünc medalları Qəbələyə aparılacaq

    Uyğun hesab qeydə alınsa, “Qəbələ”yə gümüş, “İnter”ə isə bürünc medallar təqdim olunacaq

    Bakı. 19 aprel. REPORT.AZ/ Futbol üzrə 2016/2017 mövsümündə Azərbaycan Premyer Liqasının bürünc və gümüş mükafatçıları Qəbələ şəhərində mükafatlandırıla bilər. Bu barədə “Report”a Peşəkar Futbol Liqasının (PFL) direktoru Məlik Həsənov məlumat verib.

    O, bildirib ki, aprelin 23-də XXVIII tur çərçivəsində keçiriləcək “Qəbələ” – “İnter” görüşünün yekununda meydan sahiblərinə gümüş, qonaqlara isə bürünc medalların təqdim edilməsi mümkündür. Bunun üçün isə meydan sahiblərinin 1:3-dən başlayaraq, ən azı 2 top fərqi ilə uduzmaması lazımdır: “2016/2017 mövsümündə 2-ci və 3-cü yer üçün nəzərdə tutulan medallar Qəbələyə aparılacaq. Lakin PFL-in əyalətə hansı heyətlə yollanacağı dəqiq bilinmir. Hər şey nəticədən asılıdır. Uyğun hesab qeydə alınsa, “Qəbələ”yə gümüş, “İnter”ə isə bürünc medallar təqdim olunacaq".

    Qeyd edək ki, “Qəbələ” hazırda 49 xalla 2-ci, “İnter” isə 43 xalla 3-cü pillədə qərarlaşıb. “Qırmızı-qaralar” ilk dövrədə paytaxt klubu ilə evdə qolsuz bərabərə qaldığı halda, səfərdə keçirdiyi son iki qarşılaşmada meydanı 1:1 hesablı heç-heçə və 2:0  hesablı qələbə ilə tərk edib. 

    Mətndə orfoqrafik səhv aşkar etdinizsə, səhv olan hissəni qeyd edib Ctrl + Enter düymələrini sıxın.

    Xəbər lenti

    Ən azı bir bölmə seçilməlidir

    Bütün xəbərlər


    Orphus sistemi