Yuxarı

Azərbaycan Premyer Liqasında XV tura start veriləcək

Azərbaycan Premyer Liqasında XV tura start veriləcək
İlk oyun Qəbələdə keçiriləcək

Bakı. 28 yanvar. REPORT.AZ/ Bu gün futbol üzrə Azərbaycan Premyer Liqasında 2017-ci ilin ilk turuna start veriləcək. 

"Report"un məlumatına görə, XV turun ilk oyun günündə iki qarşılaşma keçiriləcək.

Mövsümün ikinci yarısı Qəbələdə start götürəcək. Bölgənin eyniadlı komandası "Sumqayıt"ı sınağa çəkəcək. "Qəbələ" 2016-cı ili 31 xalla turnir cədvəlinin ikinci pilləsində başa vurub. "Sumqayıt" isə hazırda 17 xalla dördüncüdür. Roman Qriqorçukun rəhbərlik etdiyi komanda qələbə sayəsində turnir cədvəlinin birinci pilləsinə yüksəlmək şansı qazanacaqsa, Samir Abasovun komandası səfərdə 3 xal qazanmaqla 4-cü pillədəki yerini möhkəmləndirəcək. Tərəflər arasında bu günə qədər keçirilən 18 görüşün 13-də "Qəbələ", yalnız 1-də isə "Sumqayıt" üstün tərəf olub. 4 oyun heç-heçə başa çatıb. 3 il 5 aydır rəqibini məğlub edə bilməyən “Sumqayıt” 13 oyundur qələbə həsrətindədir. “Qəbələ” ev oyunlarında xal itirməyib. “Qırmızı-qaralar” keçirilən bütün matçlarda qol vurub.

Günün son oyunu isə Bakıda "İnter" və Gəncənin "Kəpəz" komandaları arasında olacaq. "Sarı-göylər" səfərdən qələbə ilə dönəcəyi təqdirdə 4-cü yerə qədər yüksəlmək şansı qazanacaq. Təbii ki, bu turun digər oyunlarının nəticəsindən də asılıdır. "İnter" evdə 3 xal qazansa hazırkı lider "Qarabağ"la fərqi azaldacaq. Hətta Zaur Svanadzenin rəhbərlik etdiyi komanda Qəbələdəki oyunun nəticəsindən asılı olaraq xallarını "qırmızı-qaralar"la eyniləşdirə də bilər. Komandalar bu günədək ölkə çempionatlarında 24 oyun keçirib. Bu görüşlərin 14-ü paytaxt klubunun, 4-ü isə gəncəlilərin qələbəsi ilə yekunlaşıb. Qalan 6 oyunda qalib müəyyənləşməyib. Komandalar bu dəfə 25-ci duelə çıxacaq. Sonuncu dəfə 6 il 4 ay əvvəl qalib gələn "Kəpəz" 11 matçdır qələbəyə sevinə bilmir. Rəqiblərin son üç oyununda heç-heçə qeydə alınıb.

Azərbaycan Premyer Liqası, XV tur

28 yanvar

15:00. "Qəbələ" - "Sumqayıt"

Hakimlər: Əliyar Ağayev, Zeynal Zeynalov, Rza Məmmədov, Rəvan Həmzəzadə

AFFA nümayəndəsi: Arif Fərəcov

Hakim-inspektor: Şaiq Həmidov

Qəbələ şəhər stadionu

17:30. "İnter" - "Kəpəz"

Hakimlər: Rəhim Həsənov, Namiq Hüseynov, Akif Əmirəli, Ziya Nəsirov

AFFA nümayəndəsi: Nüvər Xasıyev

Hakim-inspektor: Məlik Həsənov

"İnter Arena"

Qeyd edək ki, turun digər iki oyunu sabah keçiriləcək. "Zirə" AZAL-ı, "Qarabağ" isə "Neftçi"ni qəbul edəcək.

Mətndə orfoqrafik səhv aşkar etdinizsə, səhv olan hissəni qeyd edib Ctrl + Enter düymələrini sıxın.

Tərəfdaşların xəbərləri


Xəbər lenti

Son xəbərlər



Orphus sistemi