​Azərbaycan Premyer Liqasında XVII tura yekun vurulacaq

Bakı. 17 dekabr. REPORT.AZ/ Bu gün futbol üzrə Azərbaycan Premyer Liqasında XVII turun son iki oyunu keçiriləcək. "Report"un məlumatına görə, günün ilk qarşılaşması "Xəzər Lənkəran"la "Kəpəz" komandaları arasında baş tutacaq. 

Bölgə təmsilçilərinin duelində 3 xal hər iki komandaya vacibdir. 12 xalla turnir cədvəlinin sonuncusu "Rəvan"dan 1 pillə öndə olan Yunis Hüseynovun komandası qələbə qazanacağı təqdirdə, ən yaxın qonşusu AZAL-la xal fərqini 1-ə endirəcək. "Kəpəz" isə səfərdən qələbə ilə dönərsə, "Neftçi"ni qabaqlaya bilər. Bu komandaların turnir cədvəlində yerdəyişməsi "Neftçi" - AZAL oyunundan da asılıdır. Bölgə təmsilçiləri indiyədək ölkə çempionatlarında 13 dəfə üz-üzə gəliblər. Bu qarşılaşmaların 10-da Lənkəran, 2-də isə Gəncə təmsilçisi qələbə qazanıb. Bir oyun isə heç-heçə ilə nəticələnib.

Günün və turun son qarşılaşmasında isə "Neftçi" və AZAL komandaları üz-üzə gələcək. Əsgər Abdullayevin gəlişindən sonra uğurlu seriyanı davam etdirən "Neftçi" qələbə qazansa, 5-ci pillədə olmasına baxmayaraq, ən yaxın qonşusu "Qəbələ" ilə xal fərqini 1-ə endirəcək. Həmçinin qələbə AZAL-ın da vəziyyətinin yaxşılaşdırılmasına kömək edəcək. "Təyyarəçilər" səfərdə 3 xal qazanacağı təqdirdə, "Sumqayıt"ı qabaqlayaraq 7-ci pilləyə yüksələcək. Cütlüyün bugünədək keçirilmiş 13 oyununda "Neftçi", 6-da AZAL qələbə qazanıb. 8 oyunda isə qalib müəyyənləşməyib.

Premyer Liqa, XVII tur

14:00. "Xəzər Lənkəran" - "Kəpəz" (Gəncə)

Hakimlər: Rəhim Həsənov, Elman Musayev, Coşqun Həsənov, Mahir Məmmədov

AFFA nümayəndəsi: Əsgər Əmirəliyev

Hakim-inspektor: Asim Xudiyev

"Xəzər Lənkəran" mərkəzi stadionu

17:00. "Neftçi" (Bakı) - AZAL (Bakı)

Hakimlər: Əliyar Ağayev, Zeynal Zeynalov, Rza Məmmədov, Nail Nağıyev

AFFA nümayəndəsi: Şaiq Həmidov

Hakim-inspektor: Məlik Həsənov

"Bakcell Arena"

Qeyd edək ki, ilk 2 oyun günündə "Rəvan" evdə "İnter"ə 0:2, "Qəbələ" səfərdə "Zirə"yə 0:2 hesabı ilə uduzub. "Qarabağ" isə öz meydanında "Sumqayıt"ı yenə bilməyib - 2:2. 

Turnir cədvəli:

Klublar	O	Q	H	M	T-F	X
1	Qarabağ	17	11	4	2	27-11	37
2	Zirə	17	7	8	2	16-12	29
3	İnter	17	7	6	4	16-12	27
4	Qəbələ	17	7	6	4	23-12	27
5	Neftçi	16	6	5	5	18-16	23
6	Kəpəz	16	5	7	4	17-16	22
7	Sumqayıt	17	3	8	6	20-25	17
8	AZAL	16	4	4	8	9-17	16
9	Xəzər Lənkəran	16	3	3	10	10-21	12
10	Rəvan	17	2	5	10	9-23	11