Yuxarı
    Bağlamaq

    Azərbaycan Premyer Liqasında daha iki oyun keçiriləcək

    Oyunlar Bakı və Sumqayıtda olacaq

    Bakı. 6 fevral. REPORT.AZ/ Bu gün futbol üzrə Azərbaycan Premyer Liqasında daha iki görüş baş tutacaq. "Report"un məlumatına görə, oyunlar Bakı və Sumqayıtda olacaq.

    Günün ilk qarşılaşmasında "Sumqayıt" və "Zirə" komandaları üz-üzə gələcək. 18 xalla 8-ci pillədə qərarlaşan meydan sahibləri görüşdən 3 xalla ayrılarsa, ən yaxın qonşuları AZAL-la xal fərqini 4-ə endirəcək. Turnir cədvəlinin ikinci pilləsində dayanan "Zirə" isə çempionluq yoluna davam etmək üçün qələbə qazanmalıdır. Bu, Adil Şükürovun rəhbərlik etdiyi komandanı lider "Qarabağ"a bir az daha yaxınlaşdıracaq. Cari mövsümədək qarşılaşmayan komandaların ilk iki oyununda "Zirə" məğlub olmayıb. Qarşılaşmaların biri bərabərlik (0:0), digəri isə "Zirə"nin qələbəsi ilə başa çatıb (3:2).

    Növbəti oyunda isə "Qarabağ" və "Xəzər Lənkəran" komandaları münasibətlərinə aydınlıq gətirəcəklər. Qurban Qurbanovun rəhbərlik etdiyi komanda qalib gələcəyi təqdirdə çempionluq yolunda ən yaxın izləyicisi "Zirə" ilə xal fərqini artıracaq. Mövsümün ikinci yarısına gənc heyətlə start verən "Xəzər Lənkəran" isə sonuncu pillələrdən qurtulmaq üçün mütləq qələbə qazanmalıdır. Belə olan halda 13 xalla 9-cu pillədə olan "ağ-yaşıllar" ən yaxın qonşusu "Sumqayıt"la xal fərqini 2-yə endirəcək.

    Turun digər qarşılaşmaları fevralın 7-də keçiriləcək.

    15:00. "Sumqayıt" – "Zirə"

    Hakimlər: Ömər Paşayev, Elman Musayev, Vüqar Bayramov, Ramil Əhmədov

    AFFA nümayəndəsi: Şaiq Həmidov

    Hakim-inspektor: Vüsal Əliyev

    Sumqayıt. "Kapital Bank Arena"

    17:30. "Qarabağ" – "Xəzər Lənkəran"

    Hakimlər: İnqilab Məmmədov, Azər Əsgərov, Coşqun Həsənov, Mahir Məmmədov

    AFFA nümayəndəsi: Vaqif Davudov

    Hakim-inspektor: Kərim Ağayev

    Bakı. Tofiq İsmayılov adına Suraxanı qəsəbə stadionu

    Qeyd edək ki, turun açılış oyununda "Neftçi" "Rəvan"ı qəbul edib və matç 1:1 hesabı ilə başa çatıb.

    Mətndə orfoqrafik səhv aşkar etdinizsə, səhv olan hissəni qeyd edib Ctrl + Enter düymələrini sıxın.

    Xəbər lenti

    Ən azı bir bölmə seçilməlidir

    Bütün xəbərlər


    Orphus sistemi