Yuxarı

Azərbaycan millisinin yeganə hücumçusu yeni göstəriciyə imza atıb

Ruslan Qurbanov Premyer Liqada çıxış edən oyunçular arasında qol sayı 20 və daha çox olan 19-cu futbolçudur

Bakı. 9 noyabr. REPORT.AZ/ “Neftçi” klubunun futbolçusu Ruslan Qurbanov Azərbaycan çempionatlarında 20-ci qolunu vurub. "Report"un məlumatına görə, Premyer Liqada XII turun “Rəvan”la qarşılaşmasında 2 dəfə fərqlənən hücumçu 20-yə 95-ci matçında çatıb. 

Əvvəlki 5 mövsümdən dördündə (2010/2011 – 0, 2011/2012 – 2, 2012/2013 – 6, 2013/2014 – 4, 2014/2015 - 3) 15 qol vuran Qurbanov cari çempionatda 5-ci dəfə rəqib qapısına yol tapıb. Onun “Rəvan”ın qapısına vurduğu ilk top “ağ-qaralar”ın heyətindəki 10-cu qol olub. Sonradan bu rəqəmi 11-ə çatdıran hücumçu “Sumqayıt”da 9 dəfə fərqlənib.

Qurbanov hazırda Premyer Liqada çıxış edən oyunçular arasında qol sayı 20 və daha çox olan 19-cu futbolçudur. Bu göstəricidə Rəşad Abdullayev (54), Viktor İqbekoyi (46) və Vaqif Cavadov (43) ilk “üçlük”də qərarlaşıblar.

Qeyd edək ki, Ruslan Qurbanov Azərbaycan milli komandasının noyabrın 17-də Moldova ilə keçirəcəyi yoldaşlıq görüşünə çağırılan yeganə hücumçudur. 

Mətndə orfoqrafik səhv aşkar etdinizsə, səhv olan hissəni qeyd edib Ctrl + Enter düymələrini sıxın.

Xəbər lenti

Bütün xəbərlər


Orphus sistemi