Azərbaycan millisi Çexiya ilə qarşılaşacaq

11 Oktyabr , 2016 07:02

Bakı. 11 oktyabr. REPORT.AZ/ Bu gün futbol üzrə Azərbaycan millisi 2018-ci il dünya çempionatının seçmə qrup mərhələsində növbəti oyununu keçirəcək. "Report"un məlumatına görə, bu dəfə rəqib Çexiya yığması olacaq.

C qrupunun III turunun görüşü Çexiyanın Ostrava şəhərində olacaq. Robert Prosineçkinin rəhbərlik etdiyi komanda səfər qarşılaşmasından sərfəli nəticə ilə dönəcəyi halda daha bir tarixi uğura imza atacaq. Seçmə mərhələnin ilk oyununda San Marinonu (1:0), ardınca Norveçi məğlub edən (1:0) milli komanda tarixində ilk dəfə seçmə tsiklə ardıcıl iki qələbə ilə start verib. Bu dəfəki səfər qarşılaşmasında da 3 xal əldə olunacağı təqdirdə Azərbaycan futbolunda yeni tarix yazılacaq. Nəticədə milli 9 xalla ilk pillələrdəki mövqeyini möhkəmləndirmiş olacaq.

Azərbaycanla eyni xala malik Almaniya yığması 4 xalı olan qrup üçüncüsü Şimali İrlandiyanı qəbul edəcək. Britaniyalıların almanlardan xal almaq şansı az olduğundan, çox güman, səfər oyunun nəticəsindən asılı olmayaraq millimiz qrupdakı mövqeyini qotuyacaq.

Komandaların yolları bugünədək cəmi bir dəfə kəsişib. 2009-cu ildə BƏƏ-də keçirilmiş yoldaşlıq görüşü millinin 2:0 hesablı qələbəsi ilə yekunlaşıb.

Qeyd edək ki, milli komanda növbəti oyununu noyabrın 11-də Şimali İrlandiyaya qarşı keçirəcək. Belfastda baş tutacaq görüş Bakı vaxtı ilə saat 22:45-də başlayacaq.

Dünya çempionatı, seçmə qrup mərhələsi, III tur

11 oktyabr

22:45. Çexiya - Azərbaycan

Baş hakim: Matey Yuq

Yan xətt hakimləri: Tomaj Klançnik, Manuel Vidali

Dördüncü hakimlər: Mitya Jqanets (hamısı Sloveniya)

Ostrava. "Uindzor Park"