Yuxarı

Azərbaycan futzalçısı: "Hakimin haqsızlığı səbəbindən Portuqaliya ilə oyunu buraxacağam"

Rəqib güclüdür, ancaq düşünürəm ki, Azərbaycan yığması daha üstündür

Bakı. 25 sentyabr. REPORT.AZ/ "Çətin oyun oldu. Tayland yığması güclü rəqibdir. Heyətindəki oyunçular artıq 5-6 ildir birgə oynayır. Bir-birlərini uzun müddətdir tanıdıqlarından meydanda yaxşı anlaşırlar".

Bunu "Report"a açıqlamasında Azərbaycan futzal yığmasının üzvü Vassura Kolumbiyada keçirilən dünya çempionatının 1/8 final mərhələsində Tayland yığmasına 13:8 hesabı ilə qalib gəldikləri oyundan sonra deyib.

Braziliyalı legioner müdafiə xəttinin üzərinə böyük yük düşdüyünü söyləyib:

"İlk hissədən fərqli olaraq, ikinci hissədə daha yaxşı oynadıq. Yorğunluq öz sözünü dedi. Psixoloji cəhətdən yüklənmə vardı. Bu, oyundur. Kim qol imkanlarını daha yaxşı reallaşdırsa, o da qalib olur".

Yığma üzvü görüşün məhsuldar keçməsini təsadüfi saymadığını bildirib:

"Əlbəttə, bir oyunda 21 qol çoxdur. Böyük hesab ona görə qeydə alındı ki, hər iki komanda durmadan hücum edirdi. Əsas vaxt 7:7 hesablı bərabərliklə bitdi. Əlavə vaxtda daha yaxşı oynadıq və ümumilikdə 13 qol vurduq".

Vassura oyundan sonra oğlu ilə telefon əlaqəsi yaratdığını deyib:

"O, mənə azarkeşlik edir, məndən qol gözləyir. Taylanda 3 qol vuracağımı gözləyirdi. Ancaq mən 2-sini vurdum. Hər halda, mənə görə sevindi və təbrik etdi".

Azərbaycan yığmasını 1/4 finalda Portuqaliya yığması ilə çətin sınaq gözləyir. Ancaq Vassura növbəti sarı vərəqəsini aldığından, həmin matçda komandaya kömək edə bilməyəcək. O, hakim haqsızlığı ilə üzləşdiyini bildirməklə yanaşı, yarımfinala vəsiqə şanslarına toxunub:

"Güclü rəqiblə qarşılaşacağımızdan, çox çətin olacaq. Cəzalı vəziyyətə düşəndə xeyli məyus oldum. Çünki belə bir vacib matçda yığmaya kömək etmək istəyirdim. Bilirəm ki, komandamız güclüdür. Ancaq mən də oynamaq, meydanda olmaq istəyirdim. Kənarda qalmağım, ilk növbədə, özüm üçün pisdir. Hesab edirəm ki, hakim məni haqsız yerə cəzalandırdı. Mən sarı vərəqəlik hərəkət etməmişdim. Oyunun videotəkrarı var, FİFA-da da buna baxa bilərlər. Mən heç nə etməmişdim, ancaq cəzalandıım. Fikrimcə, şanslar bərabərdir. Heyətimizdə braziliyalı, azərbaycanlı oyunçular var. Sonadək mübarizə aparacağıq. Əlbəttə, Portuqaliya yığması güclüdür. Ancaq düşünürəm ki, Azərbaycan yığması daha üstündür".

Qeyd edək ki, bu gecə saat 3:00-da başlanacaq Portuqaliya ilə matçda Azərbaycan yığmasının daha 2 üzvü - qapçı Rövşən Hüseynli ilə digər braziliyalı legioner Fineo da cəza üzündən meydana çıxa bilməyəcəklər.

Mətndə orfoqrafik səhv aşkar etdinizsə, səhv olan hissəni qeyd edib Ctrl + Enter düymələrini sıxın.

Xəbər lenti

Bütün xəbərlər


Orphus sistemi