Hollandiyanın "Ayaks" klubu əsas komandanın baş məşqçisi Erik ten Haqla müqavilənin müddətini uzadıb.
"Report" klubun rəsmi saytına istinadən xəbər verir ki, yeni sözləşməyə əsasən, 49 yaşlı mütəxəssis 2022-ci ilin yayına kimi Amsterdam təmsilçisinə rəhbərlik edəcək.
Hollandiyalı məşqçinin əvvəlki müqaviləsi 2020-ci ilin iyuluna qədər nəzərdə tutulub.
Qeyd edək ki, Erik ten Haq 2017-ci ildən "Ayaks"ın baş məşqçisidir. Komanda 2018-2019 mövsümündə Hollandiya çempionu olmaqla yanaşı, ölkə kubokunu da qazanıb. "Ayaks" bu mövsüm Çempionlar Liqasında İspaniyanın "Real Madrid" və İtaliyanın "Yuventus" komandalarını mübarizədən kənarlaşdırsa da, yarımfinalda İngiltərə "Tottenhem"ini keçə bilməyib.