Yuxarı
    Bağlamaq

    Araz Abdullayev Rumıniya klubuna baş tutmayan transferindən danışıb

    Avropada transfer pəncərəsi bağlandığına görə Astraya keçə bilmədim

    Bakı. 01 sentyabr. REPORT.AZ/ "Neftçi"nin kapitanı Araz Abdullayevin Rumıniyanın "Astra" klubuna keçidi baş tutmayıb.

    "Report"un məlumatına görə, bu barədə 24 yaşlı futbolçu jurnalistlərə açıqlamasında bildirib.

    O, Avropa Liqasının qrup mərhələsində iştirak edən kluba transferinin alınmamasını belə izah edib:

    "Xaricdən təkliflərim vardı. Ancaq Avropada "transfer pəncərəsi" bağlandığına görə "Astra"ya keçə bilmədim. Ən azı qışadək "Neftçi"nin futbolçusuyam".

    Abdullayev San-Marino yığması ilə oyun öncəsi bir araya gələn millidə hazırlıqların yaxşı getdiyini, komandanın səylə çalışdığını bildirib:

    "Hər bir futbolçu məşqdə canla-başla çalışır. Mən də çalışıram ki, baş məşqçi start heyətində mənə şans versin. Bunun üçün özümü daha yaxşı göstərməliyəm. Baş məşqçinin etimad göstərəcəyi təqdirdə meydanda canımızı qoymağa hazırıq".

    Arazın fikrincə, "Neftçi"də son vaxtlar ruh düşkünlüyünün olması milli komandaya mənfi təsir göstərə bilməz:

    "Milliyə görə bütün gücümüzü qoymalıyıq. Rəqiblə oyuna zəif köklənsək, əlbəttə, çətinlik çəkəcəyik. Ancaq yaxşı köklənsək, inanıram ki, qələbə qazanacağıq. Biz çalışacağıq ki, San-Marinodan qələbə ilə qayıdaq. Çalışacağıq ki, azarkeşlərimizi qələbə ilə sevindirək".

    A.Abdullayev yığmaya yeni dəvət olunan Ramil Şeydayevlə Emin Mahmudovun yaxşı futbolçular olduqlarını söyləyib:

    "Milliyə dəvət alıblarsa, deməli, kömək edilməyə layiqdirlər. İndi hamımız bütün diqqətimizi San-Marino ilə oyuna yönəltmişik".

    Mətndə orfoqrafik səhv aşkar etdinizsə, səhv olan hissəni qeyd edib Ctrl + Enter düymələrini sıxın.

    Xəbər lenti

    Ən azı bir bölmə seçilməlidir

    Bütün xəbərlər


    Orphus sistemi