Amil Yunanov: "İstəyirdik, azarkeşlərin önündə ən azı 4-cü yeri təmin edək"

Bakı. 20 may. REPORT.AZ/ Azərbaycan Premyer Liqasının sonuncu – 28-ci turunda evdə "Zirə"yə uduzaraq (1:2) avrokuboklardan kənarda qalan "Sumqayıt"ın hücumçusu Amil Yunanov oyundan sonra jurnalistlərin suallarını cavablandırıb.

"Report" xəbər verir ki, Yunanov məyus olduğunu söyləyib:

- Axırıncı 5 oyun qələbə qazanmadıq. Kubokdan sonra bu vəziyyətə düşdük. Toparlana bilmədik. Çox üzgünük, çox məyusuq. İstəyirdik ki, azarkeşlərimizin önündə ən azı 4-cü yeri təmin edək. Bundan sonra "Qəbələ"nin "Keşlə"ni məğlub etməsini gözləyəcəkdik. Ancaq təəssüf ki, alınmadı.

Çox çətin, çox üzücü oyun oldu. 

- Samir Abasov istefa verdi, yəqin xəbəriniz var. Paltardəyişmə otağında sizə son sözü nə oldu?

- Bu barədə heç nə bilmirəm. Mənə də uşaqlar dedi ki, komandadan getdi.

- Öz gələcəyinizi harda görürsünüz?

- Heç bir klubdan təklif almamışam. Heç "Sumqayıt"la da yeni müqavilə ilə bağlı danışığımız olmayıb. Hələ vaxt çoxdu.

- Başqa klubdan təklif olsa, "Sumqayıt"da qalacaqsınız?

- Bunun üçün başqa klubdan təklif olmalıdır. Bu komandada pis-yaxşı mövsümlərim olub. İstəyərdim ki, ilk növbədə öz klubum, "Sumqayıt"la danışım. Daha sonra başqa komandalardan gələn təkliflərə diqqət yetirim.

- Samir Abasov daim sizə güvənib. Sabah o başqa klubun baş məşqçisi kimi sizə dəvət göndərsə, sizin də baş məşqçi ilə "Sumqayıt” arasında seçim qarşısında qalsanız, hansına üstünlük verərsiniz?

- Samir Abasovun üzərimdə haqqı çoxdur. Mən onun rəhbərliyi altında çox şans qazanmağa başladım. Əlbəttə, başqa komandanın baş məşqçisi kimi mənə dəvət göndərsə, dəyərləndirərərəm. Ancaq yenə də, "Sumqayıt"dan təklif gəlsə, ilk növbədə bu klubla danışacam.