Türkiyə klubu "Neftçi"nin futbolçusu üçün təyyarə bileti göndərib

"Neftçi"nin futbolçusu Namik Ələskərovun Türkiyənin "Buraspor" klubuna keçidi ilə bağlı problem həllini tapıb.

"Report" "bursahakimiyet.com.tr" saytına istinadən xəbər verir ki, 26 yaşlı yarımmüdafiəçi üçün tələb olunan 50 000 avro təzminat artıq Bakı klubunun hesabına köçürülüb. Hətta sözügedən məbləği oyunçunun özünün ödədiyi bildirilib.

İddiaya görə, I liqa təmsilçisi Ələskərovu Bursaya dəvət edib və onun üçün təyyarə bileti göndərib.

Qeyd edək ki, Namik Ələskərov 2017-ci ildən "Neftçi"də çıxış edir. O, 2020/2021 mövsümündə "ağ-qaralar"ın heyətində Azərbaycan Premyer Liqasının qalibi olub. Yarımmüdafiəçi həmin mövsüm 19 qolla çempionatın bombardiri adını da qazanıb.