Tanınmış futbolçuda təhlükəli infeksiya aşkarlanıb

Bakı. 2 oktyabr. REPORT.AZ/ Kot d İvuar millisinin və İngiltərənin “Arsenal” klubunun sabiq futbolçusu Emmanuel Ebuedə təhlükəli infeksiya aşkarlanıb.

“Report” goal.com saytına istinadən xəbər verir ki, hazırda Kiprin AEL komandasının formasını geyinən 34 yaşlı müdafiəçinin qan analizi müsbət nəticə verib. Orqanizmində HİV infeksiyası aşkarlanan afrikalı oyunçu növbəti dəfə müayinədən keçmək üçün İngiltərəyə yollanıb.

“Təəssüf ki, bu doğrudur. Emmanuelin sağlıq durumu ilə bağlı problemi var. Ebue bu gün növbəti dəfə müayinədən keçmək üçün İngiltərəyə yollanıb”, - deyə futbolçunun meneceri Tekin Berinçi bildirib.

Qeyd edək ki, Emmanuel Ebue karyerası ərzində “Arsenal”la yanaşı İngiltərənin “Sanderlend”, Türkiyənin “Qalatasaray” və Belçikanın “Beveren” klublarında çıxış edib.