Portuqaliyalı futbolçu Çempionlar Liqasında Devid Bekhemin rekordunu qırıb

İngiltərənin "Mançester Yunayted" klubunun futbolçusu Brunu Fernandeş UEFA Çempionlar Liqasında yeni rekorda imza atıb.

"Report" "Opta Joe"yə istinadən xəbər verir ki, 28 yaşlı yarımmüdafiəçi buna İspaniyada "Atletiko" (Madrid) komandası ilə 1:1 hesablı heç-heçə etdikləri 1/8 final mərhələsinin ilk oyununda nail olub.

80-ci dəqiqədə məhsuldar ötürmə ilə yadda qalan portuqaliyalı oyunçu "qırmızı-şeytanlar"da turnir tarixində ardıcıl 6 matçda bunu bacaran ilk futbolçusu kimi tarixə düşüb. Fernandeş klubun sabiq yarımmüdafiəçisi Devid Bekhemin 1998-ci ildəki rekordunu qırıb.

Qeyd edək ki, Brunu Fernandeş cari mövsüm "Mançester Yunayted"in heyətində 34 oyuna çıxıb, 9 qol və 14 məhsuldar ötürmə ilə yadda qalıb.