"Neftçi"nin hücumçusu: "Qələbədə pay sahibi olduğum üçün çox şadam"

"Vacib 3 xalı əldə etdiyimiz üçün sevinirəm. Ağır oyun alındı. Həm bizim, həm də rəqibin şansları oldu. Qol vurub, komandanın qələbəsində pay sahibi olduğum üçün çox şadam".

"Report"un məlumatına görə, bu fikirləri "Neftçi"nin futbolçusu Mirabdulla Abbasov "Zirə"ni 2:1 hesabı ilə məğlub etdikləri Azərbaycan Premyer Liqasının VIII tur oyunu barədə klubun rəsmi saytına açıqlamasında deyib.

"Ağ-qaralar"ın qələbə qoluna imza atan 26 yaşlı hücumçu daha çox oynamaq şansı qazanacağına ümid etdiyini bildirib: "Bunun üçün özümü yaxşı tərəfdən göstərməyə çalışacağam. Amma bu, baş məşqçinin qərarıdır və onun seçiminə hörmətlə yanaşıram".