Mütəxəssislərdən De Byazinin millidə qalmasına reaksiya: "Artıq bəhanələrə yer olmayacaq"

Mütəxəssislərdən De Byazinin millidə qalmasına reaksiya: "Artıq bəhanələrə yer olmayacaq" AFFA İcraiyyə Komitəsinin qərarı ilə Canni De Byazi Azərbaycan millisindəki işini davam etdirəcək
Futbol
533
3 Dekabr , 2021 14:53
Mütəxəssislərdən De Byazinin millidə qalmasına reaksiya: Artıq bəhanələrə yer olmayacaq
Canni De Byazi

AFFA İcraiyyə Komitəsinin (İK) qərarı ilə Canni De Byazi Azərbaycan millisindəki işini daha 10 ay davam etdirəcək.

"Report"un məlumatına görə, italiyalı baş məşqçi ilə müqavilənin yenilənməsi futbol ictimaiyyətində birmənalı qarşılanmayıb. Qərarla razılaşmayanların sayı razılaşanlardan heç də az deyil.

De Byazinin rəhbərliyi altında milli komanda 2022-ci il dünya çempionatının seçmə mərhələsində cəmi 1 xal qazanıb. Daha əvvəl isə onun komandası UEFA Millətlər Liqasında cəmi 6 xal toplayaraq, qrupdan çıxa bilməyib.

Nəticələrin istənilən səviyyədə olmamasının obyektiv səbəbləri də var. Baş məşqçinin əsas fəaliyyəti pandemiya dövrünə təsadüf edib, xəstəlik halları, tam həcmdə məşqlərin olmaması, çempionatların yeni bərpa olunması və azarkeşlərin buraxılmaması kimi ciddi əsaslar gətirmək olar.

Bəs, görəsən, Canni De Byazi ilə müqavilə müddətinin 2022-ci ilin oktyabrınadək artırılması nə dərəcədə doğru qərardır və bu, milli komanda üçün nə vəd edir?

"Yeni əcnəbi mütəxəssisin təyinatı vaxt itkisi olacaqdı"

AFFA Məşqçilər Komitəsinin üzvü Şahin Diniyev "Report"a açıqlamasında bildirib ki, qərara hörmətlə yanaşmaq lazımdır: "Qərarı biz yox, İcraiyyə Komitəsi verib. Yəqin ki, De Byazi onların qarşısında hesabat verib, öz fəaliyyət planını təqdim edib, komitə də hər şeyi incələyib. Yerli baş məşqçi olmayacaqdısa, italiyalının qalması normaldır. Çünki yeni əcnəbi mütəxəssisin təyinatı, onun bura gəlib futbolçuları tanıması, buraya uyğunlaşması həm vaxt itkisi, həm də mümkün uğursuzluq fonunda həmin şəxs üçün yaxşı bəhanə olardı. Yenə biz uduzacaqdıq. Amma saytlardan oxuduğum qədərilə De Byazinin qarşısına konkret hədəf qoyulub: Millətlər Liqasından birinci yerlə pley-offa vəsiqə qazanmaq lazımdır. Bu, yaxşı haldır. Orada müzakirə olunan, amma bizim bilmədiyimiz məsələlər var. Bəzi şeylərə yaxşı bələd deyilik. Əlbəttə, 1 xal qənaətbəxş deyil. Amma görünən odur ki, baş məşqçinin işi diqqətlə analiz olunub və onun qalmasına yekdilliklə qərar veirlib".

"De Byazinin özü də bilir ki, artıq bəhanə olmayacaq"

55 yaşlı mütəxəssisin sözlərinə görə, artıq De Byazinin özünə də bəhanələrə yer olmadığını bilir: "Bundan sonra hər hansı səbəb, bəhanə olmayacaq ki, mən futbolçuları tanımırdım, mentalitetə bələd deyildim. Artıq nə pandemiya var, nə müharibə şəraitindəyik. Şükürlər olsun, qalib ölkəyik. Hardasa pandemiyaya da qalib gəlmişik. Yəni, əvvəlki böyük problemlər yoxdur. Millətlər Liqasında qrupa 3-cü səbətdən düşəcəyik. Artıq qarşımızda yalnız 1-ci və 2-ci səbətin yığmaları olacaq. Düzdür, onlar da zəif rəqiblər deyil. Ümumiyyətlə, biz bu gün özümüzü güclü yığma adlandıra bilmərik. Vəziyyətimiz bəllidir. De Byazi hər şeyi öz üzərinə götürüb və burada qalmağa razılaşaraq müqavilə bağlayıbsa, müsbət haldır. Bu ölkənin vətəndaşı olduğumuz üçün, millinin sükanı arxasında kimin çalışmasından asılı olmayaraq, komandaya uğurlar arzulamalıyıq. Yeni baş məşqçi təsdiqlənibsə, dəstəkləməliyik".

"Bizim problemlərimiz aşağıdan gəlir"

Baş məşqçi ilə 10 aylıq müqavilə imzalandığını deyən Diniyev bu müddətdə böyük nəticələr gözləməyin düzgün olmadığını də etiraf edib: "Ən azından döyüşkən, rəqibləri ilə başabaş oynayan, başqalarının qarşısında əlacsız qalmayan komanda görmək istəyirik. Artıq futbolçuları, mentaliteti tanıyırsa, De Byazi bu cür kollektivi yaratmalıdır. Səhv limiti yoxdur. Millinin baş məşqçisi kim olursa-olsun, onu müdafiə etməliyik. Çünki belədə həm də öz yığmamızı müdafiə edirik. İnanıram ki, hər şey yaxşı olacaq. Biz hər zamanı problemi baş məşqçidə axtarırıq. Bəlkə də bundan sonra 3-5 xal artıq toplayacağıq. Amma yalnız ora fokuslanmağımız düzgün deyil. Bizim problemlərimiz aşağıdan gəlir. Uşaq futbolunda islahatlar olsa, yaxşı icraçılar hazırlansa, millinin başındakı mütəxəssisdən asılı olmayaraq, biz 13 - 17 xaldan danışacağıq. Amma hər şey birdən-birə düzəlməyəcək".

"Artıq "filan rəqib reytinqdə bizdən irəlidədir" söhbəti edilməyəcək"

AFFA-nın məşqçi kurslarının maarifləndirmə üzrə direktoru Aslan Kərimov deyib ki, İK-in qərarının doğru və ya yanlış olduğunu zaman göstərəcək: "İcraiyyə Komitəsinin qərarlarına qarışa bilmirik, çünki qəbul edən biz deyilik. Qərarın doğru və ya yanlış olduğunu danışmağın mənası yoxdur. Görünən odur ki, De Byazinin 10 aylıq iş planı var və bunu AFFA-ya təqdim edib, qarşısına konkret hədəflər qoyulub. Bundan sonra görülən işlərin nəticəsi qərarın səhv və ya düz olduğunu göstərəcək. Hamımızın istəyi yığmanın uğur qazanmasıdır. Ümid edirəm ki, ən azından Millətlər Liqasında indiyə qədərkindən daha yaxşı çıxış edib uğur qazana biləcəyik. Yüz faiz əminəm ki, bu turnirdə dişimizə uyğun rəqiblər olacaq. Artıq "filan rəqib reytinqdə bizdən irəlidədir" söhbəti olmayacaq. Heç bir bəhanəyə lüzum qalmayacaq. Lazım gəlsə, daha çox tənqid edəcəyik. Qələbələr olsa, arxasında duracağıq".

Aslan Kərimov
Aslan Kərimov

"De Byazi pandemiya şəraitində və çətin şərtlərdə işə başladı"

Mütəxəssis De Byazinin tanışlıqla bağlı hər hansı probleminin olmayacağını söyləyib: "Yeni əcnəbi baş məşqçi gətirsəydilər, deyəcəkdi ki, oyunçuları tanımırdım, mənə bu qədər vaxt lazımdır. Bunları əvvəlki təcrübədən bilirik. Amma artıq De Byazidən suallarımıza konkret cavab ala biləcəyik. 1 ildən çoxdur milli komanda ilə işləyir, çempionatdakı futbolçuların hamısına bələddir. Yəni, tanımaqla bağlı hər hansı problemi olmayacaq. Yerli mütəxəssis olmayacaqdısa, De Byazinin qalması məqsədəuyğundur. Artıq mənim əcnəbi və ya yerli baş məşqçi tərəfdarı olmağım önəm kəsb etmir. Ona görə də nə isə deməyim mənasızdır. Qərar verilibsə, ondan üz döndərmək yox, bacardığımız köməyi göstərməliyik. İstənilən halda baş məşqçiyə dəstək verməyə hazırıq. Burada başqa söhbət ola bilməz".

Kərimov italiyalı baş məşqçinin Azərbaycan millisindəki ilk fəaliyyətinin çətin dövrə təsadüf etdiyini vurğulayıb: "De Byazinin hesabatında hansı arqumentlərin olduğunu bilmirəm. Onun yığmaya baş məşqçi təyin olduğu dövrü yada salsaq, səhv etmirəmsə, birbaşa birinci oyuna gəlib çatdı. Pandemiya şəraitində və çətin şərtlərdə işə başladı. Bu mənada haqlı ola bilər. Bunu hardasa qəbul edə bilərəm".

Son xəbərlər

Orphus sistemi