Moskvada futbol üzrə XXI dünya çempionatının təntənəli açılış mərasimi keçirilib

Moskvada futbol üzrə XXI dünya çempionatının təntənəli açılış mərasimi keçirilib Dünya çempionatında 32 milli komanda mübarizə aparır
Futbol
161
14 İyun , 2018 18:42
Moskvada futbol üzrə XXI dünya çempionatının təntənəli açılış mərasimi keçirilib

Bakı. 14 iyun. REPORT.AZ/ Rusiyanın paytaxtı Moskvadakı “Lujniki” stadionunda futbol üzrə dünya çempionatının açılış mərasimi keçirilib.

"Report"un məlumatına görə, tədbirdə ingiltərəli məşhur müğənni Robbi Uilyams və rusiyalı tanınmış opera müğənnisi Aida Qarifullina möhtəşəm ifaları ilə arenaya toplaşan azarkeşlərə unudulmaz anlar bəxş ediblər.

DÇ-2018-in səfiri Viktoria Lopryova kosmosu dolaşmış topu meydanın mərkəzinə gətirib.

Səhnəyə daxil olan ikiqat dünya çempionu, braziliyalı əfsanəvi futbolçu  Ronaldo istedadlı uşağın çempionatın simvolu sayılan "Zabivaka" adlı canavarın qoruduğu qapıya topla zərbə endirməsinə şərait yaradıb.

Daha sonra açılış oyununda iştirak edəcək komandalar meydana daxil olublar.

Qeyd edək ki, açılış mərasimindən sonra keçiriləcək ilk oyunda “A” qrupunda yer alan ev sahibi Rusiya millisi Səudiyyə Ərəbistanı yığması ilə qarşılaşacaq. Mundialın açılış oyununu argentinalı Nestor Pitana idarə edəcək.

Dünya çempionatında 32 milli komanda mübarizə aparır. Millilər hər birində dörd komanda olan səkkiz qrupda yer alıblar:

“A” qrupu: Rusiya, Səudiyyə Ərəbistanı, Misir və Uruqvay;

“B” qrupu: Portuqaliya, İspaniya, Mərakeş, İran;

“C” qrupu: Fransa, Avstraliya, Peru, Danimarka;

“D” qrupu: Argentina, İslandiya, Xorvatiya, Nigeriya;

“E” qrupu: Braziliya, İsveçrə, Kosta-Rika, Serbiya;

“F” qrupu: Almaniya, Meksika, İsveç, Koreya Respublikası

“G” qrupu: Belçika, Panama, Tunis, İngiltərə;

“H” qrupu: Polşa, Seneqal, Kolumbiya, Yaponiya.

Hər qrupda ilk iki yeri tutan komandalar səkkizdəbir final mərhələsinə vəsiqə qazanacaqlar.

Dünya çempionatının qrup mərhələsinin oyunları iyunun 14-dən 28-dək keçiriləcək. Bir günlük istirahətdən sonra - iyunun 30-da start veriləcək səkkizdəbir final mərhələsinə iyulun 3-də yekun vurulacaq. İyulun 4-ü və 5-i çempionatda növbəti istirahət günləri olacaq. İyulun 6-da və 7-də dörddəbir, iyulun 10-da və 11-də yarımfinal görüşləri keçiriləcək. İyulun 14-də üçüncü yer uğrunda görüş, 15-də isə final matçı və bağlanış mərasimi olacaq.

Son xəbərlər

Orphus sistemi