Kolumbiyalı futbolçu avtomobil qəzasında dünyasını dəyişib

Bakı. 3 oktyabr. REPORT.AZ/ Kolumbiyalı futbolçu Yesid Aponsa avtomobil qəzasında dünyasını dəyişib. 

"Report"un məlumatına görə, faciəvi hadisə Quaçene şəhərində baş verib. 24 yaşlı oyunçunun avtomobili yoldan kənara uçub.

İnsidentlə bağlı araşdırmalara başlanılıb. Futbolçunun çıxış etdiyi "La Ekidad" klubu mərhumun ailəsinə başsağlığı verib.

Qeyd edək ki, Yesid Aponsa karyerası ərzində Kolumbiyanın "İndependyente", "Amerika" və "Boyaka Çiko" klublarında da çıxış edib.