Gənclər və İdman Nazirliyinin rəsmiləri dünya çempionatında iştirak edəcək güləşçilərlə görüşüblər

Gənclər və İdman Nazirliyinin rəsmiləri Olimpiya Güləş Mərkəzində olub.

"Report" Azərbaycanın Güləş Federasiyasının rəsmi saytına istinadən xəbər verir ki, nazir müavini İsmayıl İsmayılov, nazirliyin İdman şöbəsinin müdiri Fərid Mansurov və aparıcı mütəxəssis Yaşar Rzayev federasiyanın vitse-prezidenti Elçin Cəfərovla birgə Qazaxıstanın paytaxtı Nur-Sultanda keçiriləcək dünya çempionatında ölkəni təmsil edəcək güləşçilərlə görüşüb.

Onlar həm yunan-Roma, həm də sərbəst güləş üzrə millilərinin üzvlərinə lisenziya xarakterli mundialda uğurlar arzulayıb və onların qalib gələcəklərinə inandıqlarını söyləyiblər.

Qeyd edək ki, yarışın ilk günlərində mübarizə aparacaq yunan-Roma güləşçiləri sabah Qazaxıstana yollanacaq. Sərbəst güləşçilər isə sentyabrın 16-da səfərə çıxacaq. Mundial 14 - 22 sentyabrda baş tutacaq.