Çempionlar Liqasında çıxış edən klub stadion problemi ilə üzləşib

Bakı. 12 sentyabr. REPORT.AZ/ UEFA Çempionlar Liqasında çıxış edən “Napoli” klubu ev oyunlarını başqa şəhərdə keçirmək istəyir.

“Report” “Сorriere Dello Sport”a istinadən xəbər verir ki, Neapol təmsilçisinin prezidenti Aurelio De Laurentis bununla bağlı Avropa futbol qurumuna müraciət edib. O, matçları Bari şəhərində 58248 nəfərlik San-Nikola stadionunda təşkil etmək niyyətində olduqlarını deyib: “Azarkeşlərin Bariyə gəlmələri üçün 1000 avtobusun xərcini çəkməyə hazırıq. UEFA-dan ev oyunlarımızı Baridə keçirməyi xahiş etdim. Neapoldakı stadion bərbaddır. Arena beynəlxalq görüşlərdə işimizi məhdudlaşdırır. Bu səbəbdən, şəxsi stadionumu inşa etdirəcəyəm. Bu, iki il çəkəcək”.

Qeyd edək ki, “Napoli” Fransanın PSJ, İngiltərənin “Liverpul” və Serbiyanın “Srvena Zvezda” komandaları ilə birgə C qrupunda yer alıb. Neapol təmsilçisi ev oyunlarını 60200 nəfərlik "San-Paolo" stadionunda keçirir.