Bakı. 14 may. REPORT.AZ/ 17 yaşadək futbolçular arasında Bakıda keçirilən Avropa çempionatının ilk yarımfinalçısı müəyyənləşib. "Report"un məlumatına görə, Portuqaliya yığması Avstriya üzərində böyük hesablı qələbə qazanıb.
Qarşılaşma portuqalların 5:0 hesablı qələbəsi ilə yekunlaşıb. Xose Qomes oyunda het-trik edib. Mesake Dju və Migel Luis isə hərəyə bir dəfə fərqləniblər.
Portuqaliya yığmasının yarımfinaldakı rəqibi İsveç - Hollandiya matçının qalibi olacaq.
Qeyd edək ki, Portuqaliya qrup mərhələsində Azərbaycanla birgə mübarizə aparıb. Komanda A qrupunun lideri kimi 1/4 finala yüksəlib.