Futbol üzrə Azərbaycan Premyer Liqasının XXIII turu yüksək məhsuldarlıqla əlamətdar olub.
"Report" Peşəkar Futbol Liqasının rəsmi saytına istinadən xəbər verir ki, turun 4 oyununda 16 qol vurulub. “Neftçi” – “Zirə” (4:2), “Sumqayıt” – “Keşlə” (2:1), “Qəbələ” – “Qarabağ” (1:2) və “Sabah” – “Səbail” (3:1) matçlarının keçirildiyi turda orta məhsuldarlıq 4-ə bərabərdir.
Bu, cari mövsümün ikinci ən yüksək məhsuldarlıq göstəricisidir. Yalnız XI turda daha çox – 17 qol qeydə alıb. Orta məhsuldarlığın 4,25 olduğu həmin turda da eyni cütlər üz-üzə gəlib. 2018-ci ilin 10-11 oktyabrını əhatə etmiş turda “Neftçi” – “Zirə” (2:2), “Sumqayıt” – “Keşlə” (1:4), “Qəbələ” – “Qarabağ” (1:3) və “Sabah” – “Səbail” (0:4) qarşılaşmaları oynanılıb.
XIII tur həmçinin “Neftçi”nin fransalı hücumçusu Baqali Dabo üçün yubileylərlə yadda qalıb.
“Zirə” ilə ev oyununda (4:2) iki qol vuran legionerin ilk topu ikiqat önəm kəsb edib. Bu, Baqalinin Azərbaycan çempionatlarında 30-cu, “ağ-qaralar”ın heyətində Premyer Liqada 10-cu qolu olub. Hücumçu ardınca bu rəqəmləri müvafiq olaraq 31 və 11-ə də çatdırıb.
“30”u arxada qoyan bombardir üç mövsümə bu göstəriciyə nail olub. 2016/17 mövsümündə 7 (16 oyun), 2017/18 mövsümündə 13 (27 oyun) dəfə fərqlənən Dabo bu qolları “Qəbələ”də vurub. “Neftçi”dəki ilk mövsümündə 21-ci oyunda 11-ə çatan forvard ümumilikdə 64 matçda 31 qola sevinib.