Bakı. 24 sentyabr. REPORT.AZ/ Bu gün futbol üzrə Azərbaycan Premyer Liqasında VI tura start veriləcək. "Report"un məlumatına görə, ilk oyun günündə bir qarşılaşma keçiriləcək.
AZAL Şüvəlanda paytaxtın "İnter" klubunu qəbul edəcək. Komandalar bu günə qədər 30 oyun keçirib. "Təyyarəçilər" bu görüşlərin 5-də, "bankirlər" isə 12-də qələbəyə sevinib. Qalan 13 oyun bərabərliklə başa çatıb. Vurulan qolların nisbətində də "İnter" öndədir - 28:20. Cütlüyün son 11 qarşılaşmasında "İnter" məğlub olmayıb. Son 5 oyunda isə AZAL qol vura bilmir.
Zaur Svanadzenin rəhbərlik etdiyi komanda səfər oyunundan 3 xalla dönərsə, xal ehtiyatını 14-ə yüksəldərək liderliyi ələ keçirəcək. Heç-heçə isə komandanın "Qarabağ"la xallarını eyniləşdirəcək - 12 xal. AZAL isə cari mövsümdə ilk qələbəsini qazanarsa, xallarını 4-ə yüksəltmiş olacaq və "Sumqayıt"la 6-7-ci pillələri bölüşəcək. Doğma meydanda qeydə alınacaq bərabərlik də AZAL-ın sonuncu yerdən xilas olmasına kifayət etməyəcək.
Azərbaycan Premyer Liqası, VI tur
24 sentyabr
16:00. AZAL – "İnter"
Hakimlər: Əliyar Ağayev, Zeynal Zeynalov, Rza Məmmədov, Akif Əmirəli
Əlavə köməkçi hakimlər: Fariz Yusifov, Rauf Cabbarov
AFFA nümayəndəsi: Eldəniz Musayev
Hakim-inspektor: Məlik Həsənov
Bakı. "AZAL Arena"
Qeyd edək ki, sentyabrın 25-də Premyer Liqada daha iki oyun keçiriləcək. "Kəpəz" Gəncədə "Qarabağ"ı, "Zirə" isə evdə "Qəbələ"ni sınağa çəkəcək. Turun son görüşü sentyabrın 27-də olacaq. "Neftçi" "Əlincə Arena"da "Sumqayıt"ı qonaq edəcək.