AFFA İntizam Komitəsi "Qarabağ"ı, baş məşqçini və futbolçunu cəzalandırıb

Bakı. 19 may. REPORT.AZ/ AFFA İntizam Komitəsi Azərbaycan Premyer Liqasının qalibi "Qarabağ" klubunu cəzalandırıb. "Report"un məlumatına görə, XXXIV turun “Sumqayıt”la matçı başa çatdıqdan sonra Ağdam komandasının azarkeşləri tərəfindən pirotexniki vasitələrdən istifadə edilib.

Bu səbəbdən, klub 1000 manat cərimə olunub. İki klubun əvəzediciləri arasındakı görüşün 57-ci dəqiqəsində isə “Qarabağ”ın məşqçisi Aftandil Hacıyev texniki zona qaydalarını pozub. Nəticədə o, 1 oyun cəzalanıb, klubu 500 manat ziyana düşüb.

Əvəzedicilərin yarışı ilə bağlı ən sərt cəzaya "Bakı" klubu məruz qalıb. Paytaxt təmsilçisi “Simurq”la Zaqataladakı qarşılaşmada iştirak etmədiyindən, 0:3 hesablı texniki məğlubiyyətə və 2500 manat cəriməyə məruz qalıb.

I Divizionda isə “Şuşa Qarabağ”ın baş məşqçisi Nadir Qasımov “Kəpəz”lə oyundan sonra meydana daxil olaraq geniş kütlə qarşısında hakimlər briqadasına qarşı təhqiramiz ifadələr işlədib. İntizam Komitəsi təcrübəli mütəxəssisin 10 oyun stadiona girişinə qadağa qoyub, klub 2000 manat cərimələnib.

"Rəvan" klubunun futbolçusu Tural Nərimanov da sərt cəza ilə üzləşib. O, "Mil-Muğan"la matçın 85-ci dəqiqəsində qırmızı vərəqə alaraq meydanı tərk edərkən, rəqibə qarşı təhqiredici ifadələr işlədib. Nəticədə Nərimanov 3 oyun cəzalanıb, klub 200 manat cərimə olunub.