Tomas Bax: "Tokio olimpiadasındakı səviyyə məni təəccübləndirdi"

"Mən də daxil olmaqla, hamımız olimpiadanın ruhsuz keçəcəyindən narahat idik. Amma tam fərqli mənzərənin şahidi olduq. İdmançılar Oyunlara nəhəng olimpiya ruhu verə bildilər".

"Report"un məlumatına görə, bunu Beynəlxalq Olimpiya Komitəsinin prezidenti Tomas Bax jurnalistlərə açıqlamasında Tokio-2020 Yay Olimpiya Oyunlarının gedişatı barədə danışarkən deyib.

Almaniyalı funksioner bildirib ki, hazırkı atmosfer əvvəlkindən daha güclüdür: "Bir çox söhbətlərdə Oyunların baş tutmasına görə böyük minnətdarlıq sözləri eşitdim. Buradakı idman səviyyəsi də inanılmaz dərəcədə yüksək oldu və bu da məni yaxşı mənada təəccübləndirdi. Axı, son 16 ayda hansı sınaqlardan keçdiyimizi hamımız bilirik".

Qeyd edək ki, Tokio olimpiadasına avqustun 8-də yekun vurulacaq.