Yuxarı
    Bağlamaq

    Mariya Stadnik: "Qələbələrə adət etmişəm"

    28 yaşlı pəhləvan bildirib ki, 5 qat qitə çempionluğu ilə yığmadakı digər qadın güləşçilərə də yüksək əhval-ruhiyyə bəxş edib

    Bakı. 8 mart. REPORT.AZ/ "Həm özümə, həm də komandamıza bayram hədiyyəsi etdim". "Report"-un məlumatına görə, bunu Azərbaycanın qadın güləşi üzrə milli komandasının lideri Mariya Stadnik Latviyanın paytaxtı Riqada əldə etdiyi Avropa çempionluğundan sonra Güləş Federasiyasının mətbuat xidmətinə açıqlamasında deyib.

    28 yaşlı pəhləvan bildirib ki, 5 qat qitə çempionluğu ilə yığmadakı digər qadın güləşçilərə də yüksək əhval-ruhiyyə bəxş edib. O, fürsətdən istifadə edərək, bütün Azərbaycan qadınlarını 8 mart bayramı münasibətilə təbrik edib: "Bütün qadınları, gözəlləri təbrik edirəm. Qoy, həmişə sevimli, sağlam olsunlar və ailələri ilə yaxşı günlər keçirsinlər".

    Stadnikin fikrincə, Avropa çempionatı 2016-cı il Rio-de-Janeyro Yay Olimpiya Oyunlarına hazırlıq mərhələsi xarakteri daşıyıb: "Olimpiada istənilən idmançı üçün əsas yarışdır. Avropa çempionatı isə "Rio-2016"ya gedən yoldur. Hamı olimpiadaya hazırlaşır. Hələ ötən ilki dünya çempionatında lisenziyanı qazandığımdan, olimpiadaya məqsədəuyğun şəkildə hazırlaşıram".

    Artıq qələbəyə adət etdiyini deyən təcrübəli pəhləvan dünya çempionluğu və "Bakı 2015" I Avropa Oyunlarındakı qızıl medalı ilə birgə 7-ci titulunu qazandığını xatırladıb: "İstənilən halda, bu medalların öz təəssüratları var. Amma ilk çempionluqla indikini müqayisə etmək olmaz. Çünki indiki emosiyalarım daha sakitdir".

    "Rio-2016"dək bir neçə turnirə də qatılacağını deyən Stadnik hələlik həmin yarışın müəyyənləşmədiyini bildirib: "Dünya Kubokunda iştirak etməyi planlaşdırırdıq, amma təəssüf ki, bu il olmayacaq. Bu yarış bizim siyahımızdan çıxıb. Yəqin ki, indi hansı turnirə qatılmalı olduğumuz üzərində düşünəcəyik".

    Qeyd edək ki, Mariya Stadnik 2008, 2009, 2011, 2014 və 2016-cı illərdə Avropa çempionu olub. Onun aktivində "Bakı 2015" I Avropa oyunlarının qızıl medalı və 2009-cu ilin Avropa çempionluğu da var.

    Mətndə orfoqrafik səhv aşkar etdinizsə, səhv olan hissəni qeyd edib Ctrl + Enter düymələrini sıxın.

    Xəbər lenti

    Ən azı bir bölmə seçilməlidir

    Bütün xəbərlər


    Orphus sistemi