Böyük Britaniyada yaşayan kartinq pilotu: "Hədəfim azərbaycanlı "Formula 1" pilotu ünvanına sahib olmaqdır"

Böyük Britaniyada yaşayan kartinq pilotu: "Hədəfim azərbaycanlı "Formula 1" pilotu ünvanına sahib olmaqdır" Hədəfim azərbaycanlı Formula 1 pilotu ünvanına sahib olmaqdır. Gələcəkdə ən yaxşı sürücülərin sırasında yer almaq istəyirəm.
Fərdi
114
28 Dekabr , 2019 12:53
Böyük Britaniyada yaşayan kartinq pilotu: Hədəfim azərbaycanlı Formula 1 pilotu ünvanına sahib olmaqdır

"Hədəfim azərbaycanlı "Formula 1" pilotu ünvanına sahib olmaqdır. Gələcəkdə ən yaxşı sürücülərin sırasında yer almaq istəyirəm".

"Report" xəbər verir ki, bunu Böyük Britaniyada yaşayan azərbaycanlı kartinq pilotu Cəmil Həsənli Rocers "Baku City Karting"də təşkil edilən mətbuat konfransında deyib.

Hazırda İngiltərənin "Coles Racing" komandasında çıxış edən 14 yaşlı sürücü ilk dəfə 8 yaşında kartinq sürməyə başladığını söyləyib: "Jurnalda gördüyüm kartinq şəkli diqqətimi çəkdi və istiqamətə yönəldim. Əslində, bu, gizli, üzdə olmayan idman növüdür. Adətən, ailədə bu sahə ilə bağlı şəxslər olanda uşaqlar da maraqlanır".

Həsənli "Formula 1"in Azərbaycanda keçirilməsini sevinclə qarşılayıb: "Mənim üçün gözlənilməz xəbər oldu və bunu fərəhlə qarşıladım. Bakıdakı yarışları izləmişəm. Ən çox bəyəndiyim pilotlar Lüis Hemiltonla Daniel Rikkardodur. Hədəflərimə çatmaq üçün çox vəsait tələb olunur. İlk hədəfim "Formula 4"də yarışmaqdır. Sponsorlar tapdıqca, irəliləmək imkanı olacaq".

Yeniyetmə pilot avtomobil idmanı ilə yanaşı, DJ sənətinə maraq göstərdiyini bildirib.

Qeyd edək ki, Cəmil Həsənli Rocers artıq 6 ildir kartinqlə məşğul olur. İlk dəfə podiuma 12 yaşında çıxan Azərbaycan idmançısı üçün bu il ən uğurlu olub. O, “Super One” çempionatının 8 yarışından 5-də podiuma yüksələrək ümumi hesabda 3-cü yeri tutub.

Yeniyetmə pilot azərbaycanlı aktrisa, Azərbaycan SSR-nin Əməkdar artisti Şəfiqə Qasımovanın və dirijor Əşrəf Həsənovun nəticəsidir.

Media nümayəndələri ilə görüşdən sonra C.Həsənli yerli idmançılarla kartinqdə qüvvəsini sınayıb. Yarışda Bakı Şəhər Kartinq Mərkəzinin tələbəsi Rüstəm Vəliyev 57,774 saniyə göstərici birinci olub. C.Həsənli (58,015) ikinci, İsa Hüseynov (58,146) isə üçüncü yeri tutub.

Son xəbərlər

Orphus sistemi