Sərbəst güləşçilərimiz lisenziya turnirində 4 medal qazandı - YENİLƏNİB

Azərbaycanın daha bir sərbəst güləşçisi Macarıstanın paytaxtı Budapeştdəki Avropa Olimpiya Təsnifat turnirində medal görüşünə çıxıb.

"Report"un məlumatına görə, 125 kq-da yarışan Camaləddin Məhəmmədov "bürünc" uğrunda albaniyalı Paris Karepi ilə qarşılaşıb.

Rəqibinə 11:0 hesabı ilə qalib gələn idmançı Azərbaycana lisenziya turnirində 4-cü medalı qazandırıb.

Qeyd edək ki, daha əvvəl Hacı Əliyev (65 kq) və Hacımurad Hacıyev (74 kq) gümüş, İslam Bazarqanov (57 kq) isə bürünc medala yiyələnib.

86 kq-da güləşən Abubakr Abakarov isə bürünc medal uğrunda görüşdə Slovakiya təmsilçisi Boris Makoyevə uduzub.

Azərbaycanın daha bir sərbəst güləşçisi Macarıstanın paytaxtı Budapeştdəki Avropa Olimpiya Təsnifat turnirində gümüş medal qazanıb.

"Report"un məlumatına görə, 74 kq-da mübarizə aparan Hacımurad Hacıyev tatamiyə çıxmaqdan imtina etdiyi üçün 2-ci yerlə kifayətlənib.

Onun hansı səbəbdən güləşmək istəmədiyi bilinmir.

Qeyd edək ki, Hacı Əliyevlə (65 kq) yanaşı, H.Hacıyev də Tokio olimpiadasına lisenziya əldə edib.

Azərbaycanın sərbəst güləşçisi Hacı Əliyev Macarıstanın paytaxtı Budapeştdəki Avropa Olimpiya Təsnifat turnirində gümüş medal qazanıb.

"Report"un məlumatına görə, 65 kq-dakı idmançı finalda Ermənistan təmsilçisi Vazgen Tevanyana məğlub olaraq, fəxri kürsünün ikinci pilləsinə çıxıb.

Əliyev finala vəsiqə qazanmaqla, Tokio-2020 Yay Olimpiya Oyunlarına lisenziyanı təmin edib.

Azərbaycanın sərbəst güləşçisi İslam Bazarqanov Macarıstanın paytaxtı Budapeştdəki Avropa Olimpiya Təsnifat turnirində bürünc medal qazanıb.

"Report"un məlumatına görə, 57 kq çəki dərəcəsində mübarizə aparan idmançı moldovalı Petru Krakiun ilə üz-üzə gəlməli idi.

Lakin rəqib döşək üzərinə çıxmaq istəmədiyi üçün Bazarqanova texniki qələbə verilib.

Qeyd edək ki, bu, Azərbaycanın turnirdəki ilk medalıdır.