Dünya çempionatında qalib gələn boksçulara ilk dəfə kəmər veriləcək

Dünya çempionatında qalib gələn boksçulara ilk dəfə kəmər veriləcək Beynəlxalq Boks Federasiyası (AIBA) qarşıdakı dünya çempionatının qaliblərini gözəl görünüşlü medallarla yanaşı, kəmərlərlə də mükafatlandıracaq.
Fərdi
175
19 Oktyabr , 2021 17:53
Dünya çempionatında qalib gələn boksçulara ilk dəfə kəmər veriləcək

Beynəlxalq Boks Federasiyası (AIBA) qarşıdakı dünya çempionatının qaliblərini gözəl görünüşlü medallarla yanaşı, kəmərlərlə də mükafatlandıracaq.

"Report"un AIBA-nın rəsmi saytına istinadən məlumatına görə, medallar müvafiq olaraq saf qızıl və gümüşdən hazırlanacaq.

Qurumun prezidenti Umar Kremlyov bildirib ki, bu addım idmançıların motivasiyasını artırmağa xidmət edir: "Belə bir nüfuzlu titul sayəsində çempionlar nəinki qürurla daşıyacaqları medal və kəmər, həm də yaxşı pul mükafatı alacaqlar. Əminəm ki, bu, gənc nəsli boks zallarına getməyə, gərgin məşq etməyə və yeni zirvələrə çıxmağa həvəsləndirəcək".

Eyni zamanda, dünya çempionatının rəsmi əlcəklərinin rəngi dəyişəcək. Qırmızı və mavi rəngləri ağ rəngli AIBA loqotipləri əvəzləyəcək. Rinq küncləri arasındakı fərq formanın rəngində qalacaq. Lakin qaydalar iştirakçılara formalarında milli rəngləri də əks etdirməyə imkan verəcək.

Kremlyovun sözlərinə görə, ağ əlcəklər böyük tədbirlərdə yeni başlanğıc, ədalət və şəffaflığı simvollaşdıracaq: "Hər kəsə şans vermək üçün əlimizdən gələni edəcəyik".

Bundan başqa, AIBA gender bərabərliyi prinsiplərinə tam sadiq olduğunu və bütün boksçularla ədalətli davrandığını açıqlayıb. Qeyd olunub ki, Türkiyənin İstanbul şəhərində qadınlar arasında keçiriləcək dünya çempionatında boksçulara hər çəki dərəcəsində eyni məbləğdə pul mükafatları veriləcək.

Qeyd edək ki, dünya çempionatı bu il 24 oktyabr - 6 noyabrda Serbiyanın paytaxtı Belqradda təşkil olunacaq. İlk dəfə 13 çəki dərəcəsində keçiriləcək yarışda 105 ölkədən 650 boksçunun iştirakı gözlənilir. 2,6 milyon ABŞ dolları mükafat fonduna malik mundialda çempion 100 000 dollar qazanacaq. İkinci yerin sahibi 50 000 dollar, üçüncü pilləni tutacaq boksçu 25 000 dollar mükafat alacaq.

Son xəbərlər

Orphus sistemi