Dünya çempionatı: Azərbaycan güləşçisi yarımfinalda uduzub

Azərbaycanın qadın güləşçisi Birgül Soltanova Rusiyanın Ufa şəhərində gənclər arasında dünya çempionatında yarımfinal görüşünə çıxıb.

"Report"un məlumatına görə, 62 kq çəki dərəcəsində 1/4 finalda qırğızıstanlı Dilnaz Sazanovaya 9:7 hesabı ilə qalib gələn idmançı finala gedən yolda Hindistan təmsilçisi Devil Sancu ilə qarşılaşıb.

Rəqibinə 5:8 hesabı ilə məğlub olan Soltanova finala çıxa bilməyib. O, Luisa Şeel (Almaniya) / İva Geriç (Xorvatiya) cütünün qalibi ilə bürünc medal uğrunda güləşəcək.

Təsnifat mərhələsində Otqontuya Çinbolda (Monqolustan) 2:12 hesabı ilə uduzan Elnurə Məmmədova (53 kq) rəqibi finala çıxmadığı üçün mübarizəni dayandırıb. 1/4 finalda Amina Kapezana (Rumıniya) 1:3 hesabı ilə məğlub olan Nigar Mirzəzadə (63 kq) də eyni aqibətlə üzləşib.