Yuxarı

“Formula-1” yarışının Bakıda keçirilməsinə dair müqavilənin imzalanmasından 2 il ötür - VİDEO

Biz əminik ki, 2016-cı il “Formula-1” Avropa Qran-prisinin “Odlar ölkəsində, Sürət zirvəsində!” devizi böyük uğurla reallaşacaq”

Bakı. 28 aprel. REPORT.AZ/ Bu gün Azərbaycan höküməti ilə "Formula 1" rəhbərliyi arasında "Formula 1" dünya çempionatı çərçivəsində Qran-pri yarışlarından birinin paytaxt Bakı şəhərində keçirilməsinə dair müqavilənin imzalanmasının ikinci ildönümüdür. "Report"un məlumatına görə, Bakı Şəhər Halqası Əməliyyat Şirkətinin icraçı direktoru Arif Rəhimov bu münasibətlə öz təbriklərini bildirib.

A.Rəhimov Bakı Şəhər Halqasının Bakıda keçiriləcək "Formula-1" Avropa Qran-prisinin "Odlar ölkəsində, Sürət zirvəsində!" devizini böyük uğurla reallaşdıracağını deyib: “Biz bundan düz iki il əvvəl Bakıda ilk dəfə “Formula-1” Qran-pri yarışının keçirilməsinə dair müqavilə imzaladıq. Komandamız ölkəmiz üçün tarixi əhəmiyyətə sahib bu idman yarışını uğurla həyata keçirmək üçün yorulmadan çalışır. Mən fürsətdən istifadə edərək bu işdə əməyi keçən və bu arzunun gerçəkləşməsində yaxından iştirak edən hər kəsə öz təşəkkürümü bildirirəm. Biz əminik ki, Bakı Şəhər Halqası, 2016-cı il “Formula-1” Avropa Qran-prisinin “Odlar ölkəsində, Sürət zirvəsində!” devizini böyük uğurla reallaşdıracaq”.

“Formula-1”in ən yeni şəhər treki özündə qədimliklə müasirliyi birləşdirən paytaxt Bakının gözoxşayan mənzərəyə sahib mərkəzi küçələrində yerləşir. YUNESKO-nun Ümumdünya Maddi İrsi Siyahısına salınmış tarixi İçəri Şəhər qoruğunun, müasir üslubda inşa olunmuş əzəmətli Alov Qüllələrinin və füsunkar gözəlliyə sahib Dənizkənarı Parkın trekin ətrafında yerləşməsi Bakını “Formula-1” yarışının zövqlə izləniləcəyi unikal məkana çevirir.

Bakı Şəhər Halqasının memarı Herman Tilkeyə görə, “Formula-1”in Azərbaycanda inşa olunmuş ən yeni treki dünyada ən sürətli şəhər treki ünvanına tezliklə yiyələnəcək. Herman Tilke əməliyyat şirkətinin rəsmi saytına verdiyi müsahibədə bildirib ki, Bakı Şəhər Halqası sahib olduğu bir sıra xüsusiyyətlərə görə digər treklərdən fərqlənir:

“Bakı Şəhər Halqasını “Formula-1”in daimi trekləri ilə müqayisə etmək düzgün deyil. Çünki bu, şəhər trekidir. Analoji treklərlə müqayisədə Bakı Şəhər Halqası öz unikallığı ilə seçilir. Bu trekin “Formula-1” təqvimində şəhər treklərinin ən sürətlisi olacağı gözlənilir. Trekin şəhərin tarixi məkanlarından keçməsi həm tribunalarda, həm də televiziya ekranları qarşısında əyləşən tamaşaçılar üçün qeyri-adi və yaddaqalan yarış əhval-ruhiyyəsi yaradacaq. Bakı Şəhər Halqası məhz bu xüsusiyyətinə görə azarkeşləri özünə cəlb edəcək. Bu baxımdan deyə bilərəm ki, “Formula-1” təqvimində Bakı Şəhər Halqasına bənzər ikinci bir trek yoxdur və bu trek mövsümün ən həyəcanlı yarışına ev sahibliyi edəcək”.

Yarış həftəsonu ərəfəsində dünya musiqisinin ən məşhurlarından Kris Braunun, Enrike İqlesiasın və Farel Vilyamsın Bakıda ən çox dinlənilən mahnıları ilə çıxış etməsi Avropa Qran-prisini daha yaddaqalan edəcək. Bu dünya ulduzları 17-18 iyun tarixlərində hər gün biri olmaqla müvafiq ardıcıllıqla “Formula-1” Şəhərciyində qurulmuş səhnəyə çıxacaq və yarışı izləmək üçün dünyanın müxtəlif yerlərindən Bakıya gəlmiş “Formula-1” azarkeşlərinə unudulmaz anlar yaşadacaqlar.



Mətndə orfoqrafik səhv aşkar etdinizsə, səhv olan hissəni qeyd edib Ctrl + Enter düymələrini sıxın.

Xəbər lenti

Bütün xəbərlər


Orphus sistemi