Azərbaycanın güləş yığmaları təlim-məşq toplanışlarını davam etdirir

Güləş üzrə böyüklərdən ibarət Azərbaycan yığma komandaları təlim-məşq toplanışlarını davam etdirir.

Federasiyanın Mətbuat Xidmətindən "Report"a verilən məlumata görə, sərbəst güləş üzrə yığma mayın 8-dən baş məşqçi Namiq Abdullayev, böyük məşqçi Zəlimxan Hüseynov və məşqçi Arif Abdullayevin rəhbərliyi altında xüsusi fiziki hazırlığı əhatə edən toplanış keçir. Olimpiya Güləş Mərkəzində təşkil olunan hazırlıq prosesində İsveçrə, Estoniya və Latviya milliləri də iştirak edir. Toplanış mayın 25-dək davam edəcək. Komanda bir neçə gün fasilə verdikdən sonra həmin məkanda növbəti toplanışa başlayacaq. Bu dəfə isə taktiki-texniki çalışmalara üstünlük veriləcək.

Yunan-Roma güləşi üzrə milli isə mayın 8-dən Türkiyə və Qazaxıstan yığmalarıyla birgə həm fiziki, həm də taktiki-texniki çalışmaları əhatə edən təlim-məşq toplanışı keçir. Baş məşqçi Aleksandr Tarakanov, böyük məşqçi Rövşən Bayramov və məşqçi Həsən Əliyevin rəhbərliyi altında 13 güləşçi hazırlıq prosesində iştirak edir. Ankaranın Elmadağ qəsəbəsində keçirilən təlim-məşq toplanışı mayın 27-dək davam edəcək.

Qadınlardan ibarət yığma Qazaxıstanda məşqləri davam etdirir. Baş məşqçi əvəzi Rövşən Umudovun rəhbərliyi altında yerli komandanın üzvləriylə birgə hazırlıq keçən xanım idmançılar toplanış başa çatdıqdan sonra Almatıda təşkil olunacaq Bolat Turlıxanov Kubokunda iştirak edəcək. İyunun 2-dən 5-dək baş tutacaq yarış ilin 2-ci reytinq turniri sayılır.