Bakı. 23 aprel. REPORT.AZ/ Rusiyanın Kazan şəhərində cüdo üzrə Avropa çempionatı davam edir.
"Report"un məlumatına görə, 2016-cı il Rio-de-Janeyro Yay Olimpiya Oyunlarına lisenziya baxımından önəm daşıyan yarışın üçüncü günündə Azərbaycanın 4 cüdoçusu tatami üzərinə çıxacaq.
90 kq çəkidə mübarizə aparan Məmmədəli Mehdiyev 1/16 finaldan mübarizəyə qoşulacaq. Onun rəqibi ukraynalı Quedjau Nhabali olacaq. 100 kq-da çıxış edən Elmar Qasımov 1/8 finalda Artyom Bloşenko (Ukrayna) - Niyaz Bilalov (Rusiya) cütünün qalibi ilə görüşəcək. Eyni çəkidə çıxış edən Elxan Məmmədov 1/16 finalda rusiyalı Adlan Bisultanovla qarşılaşacaq. Azərbaycanın daha bir cüdoçusu Uşanqi Kokauri (+100 kq) 1/16 finalda litvalı Marius Paskeviçiusla münasibətlərinə aydınlıq gətirəcək. Cütün qalibi 1/8 finalda israilli Or Sassonla üz-üzə gələcək.
Qeyd edək ki, çempionatın ilk günündə 60 kq çəkidə mübarizə aparan Orxan Səfərov gümüş medal qazanıb. Turnirin ikinci günündə isə Rüstəm Orucov qızıl medala yiyələnib.