Azərbaycan cüdoçusu "Böyük Dəbilqə" turnirində finala yüksəlib

Bakı. 24 fevral. REPORT.AZ/ Azərbaycan cüdoçusu Rüstəm Orucov Almaniyanın Düsseldorf şəhərində "Böyük Dəbilqə” turnirində finala vəsiqə qazanıb.

"Report" xəbər verir ki, 73 kq çəki dərəcəsində mübarizə aparan 27 yaşlı idmançı 1/16 finalda avstraliyalı Ceyk Benstedi, 1/8 finalda isə tacikistanlı Bəhruz Xocazodanı məğlub edib.

R.Orucov 1/4 finalda ermənistanlı Ferdinand Karapetyanla qarşılaşıb.

Görüş Azərbaycan cüdoçusunun qələbəsi ilə başa çatıb. Orucov qızıl xalla qalib gəlib. O, yarımfinalda almaniyalı İqor Vandtke ilə üz-üzə gəlib. Bu görüşün də taleyi əlavə hissədə həll olunub. Azərbaycan cüdoçusu rəqibinə ipponla qalib gələrək, finala yüksəlib. Həlledici görüşdə 27 yaşlı cüdoçu yaponiyalı Şohey Ono ilə qarşılaşacaq. Ono ilk görüşündə daha bir azərbaycanlı Hidayət Heydərova qalib gəlib.

81 kq-da yer alan Fəqan Quluzadə də elə ilk görüşdə polşalı Damian Şvarnoveçkiyə uduzaraq, mübarizəni dayandırıb.

Qeyd edək ki, ilk yarış günündə Azərbaycan cüdoçuları medalsız qalıblar.