Yuxarı
    Bağlamaq

    Azərbaycan 2018-ci il Yeniyetmələrin III Yay Olimpiya Oyunlarına ilk lisenziyanı qazanıb

    Bu vəsiqə ağırlıqqaldırma üzrə dünya birinciliyinin yekununda əldə olunub

    Bakı. 11 aprel. REPORT.AZ/ Azərbaycan 2018-ci ildə Argentinanın paytaxtı Buenos-Ayresdə keçiriləcək Yeniyetmələrin III Yay Olimpiya Oyunlarına ilk lisenziyanı qazanıb. 

    "Report"un məlumatına görə, bu vəsiqə ağırlıqqaldırma üzrə Tailandın paytaxtı Banqkokda keçirilən 7-ci dünya birinciliyinin yekununda əldə olunub. Azərbaycanı təmsil edən 6 atlet ümumilikdə 90 xal qazanıb. Bu xallarla Azərbaycan komandası dünya birinciliyinin ümumi sıralamasında 9-cu yeri tutub. 

    Azərbaycan Ağır Atletika Federasiyasının mətbuat xidməti bildirir ki, dünya birinciliyində ilk "7-liy"ə düşən ölkələr 2, sonrakı 10 ölkə isə 1 lisenziya qazanıb. Sıralama hər bir ölkənin yarışda iştirak edən 6 ən yaxşı atletinin qazandığı xala əsasən aparılıb. Azərbaycan təmsilçilərindən Vüqar Əliyev (62 kq) 7-ci, Elməddin Hüseynov (56 kq) 8-ci, Tarmenxan Babayev (77 kq) və Ümidvar Bayramlı (94 kq) 10-cu, Mayıl Şükürlü (77 kq) 15-ci, İsmayıl Məmmədov (56 kq) 16-cı, Həsənbəy Həsənzadə (+94 kq) 17-ci, Elvin Abdullayev (62 kq) isə 25-ci yeri tutub.  Lisenziya 2001-2002 təvəllüdlü yeniyetmələr tərəfindən qazanılsa da, gələn il Oyunlarda 2000-ci il təvəllüdlü atletlər də mübarizə apara biləcək. Azərbaycan yığması Ermənistan, Ukrayna, Gürcüstan, KXDR, Rumıniya və başqa bu kimi güclü ölkələri arxada qoyub. 

    Qeyd edək ki, gələn il keçiriləcək Avropa birinciliyində komanda hesabında ilk 4 yerdən birini tutmaqla daha bir lisenziya əldə etmək mümkündür. 

    Mətndə orfoqrafik səhv aşkar etdinizsə, səhv olan hissəni qeyd edib Ctrl + Enter düymələrini sıxın.

    Xəbər lenti

    Ən azı bir bölmə seçilməlidir

    Bütün xəbərlər


    Orphus sistemi