Yuxarı

​Vahid Ələkbərov Rumıniya prezidentinə məktub yazıb

LUKoyl prezidenti Klaus Yohannis ilə şəxsən görüşmək istədiyini bildirib

Bakı. 15 İyul. REPORT.AZ/ Rusiyanın "LUKoyl" neft şirkətinin prezidenti Vahid Ələkbərov Rumıniyanın dövlət başçısı Klaus Yohannisə məktub yazıb.

"Report" RBK-ya istinadən xəbər verir ki, 9 iyul tarixli ikisəhifəli məktubun mətni yerli "Digi24" telekanalının saytında dərc olunub.

Şirkət nümayəndəsi məktubu şərh etməkdən imtina edib, lakin onun məzmununu təkzib etməyib.

Çərşənbə axşamı "LUKoyl"un vitse-prezidenti Tomas Müller bildirib ki, şirkət Rumıniya hökumətinin nümayəndələri ilə görüş barədə bir neçə sorğu göndərib, lakin hələ ki, cavab gəlməyib.

Vahid Ələkbərov məktubunda Ploeşti şəhərində "Petrotel Lukoil" NEZ-i (Müəssisənin səhmlərinin 97%-i "LUKoyl"a məxsusdur) ilə bağlı yaranan vəziyyət səbəbindən Yohannis ilə şəxsən görüşməyi xahiş edir.

Ötən həftə məlum oldu ki, Rumıniya Prokurorluğu "LUKoyl"un NEZ-i idarə edən törəmə şirkəti "Lukoil Europe Holdings B.V"nin aktivlərinə (2 mlrd. avro) həbs qoyub. Şirkət çirkli pulların yuyulması və 2012-2013-cü illərdə 230 milyon avro məbləğində vergidən yayınmaqda ittiham olunur.

" "LUKoyl" ASC-nin Rumıniyada cari fəaliyyəti və uzunmüddətli planlarına dair gərgin məsələlərin müzakirəsi üçün şəxsi görüşün keçirilməsi xahişi ilə yenidən sizə müraciət etmək məcburiyyətindəyəm", — deyə V.Ələkbərovun məktubunda bildirilir.

O qeyd edir ki, Rumıniya Prokurorluğunun yeni ittihamları "yenidən NEZ-i bağlanma təhlükəsi ilə üz-üzə qoyub". V.Ələkbərovun sözlərinə görə, NEZ ətrafında yaranan vəziyyət "müəssisənin, əksəriyyəti demək olar ki, Rumıniya vətəndaşı olan işçilərini narahat edir".

O məktubunda, həmçinin müəssisənin stabil işinin bütün Avropa İttifaqının (Aİ) neft məhsulları ilə təminatına təsir etdiyi üçün daha şəffaf yoxlamanın aparılması məqsədi ilə Aİ rəhbərliyinə müraciət etdiyi barədə Rumıniya prezidentinə məlumat verib.

Mətndə orfoqrafik səhv aşkar etdinizsə, səhv olan hissəni qeyd edib Ctrl + Enter düymələrini sıxın.

Xəbər lenti

Bütün xəbərlər


Orphus sistemi